ციფრულ მაუწყებლობაზე გადასვლის თარიღმა ორი კვირით გადაიწია

პოლიტიკა - 19:39, 15 Jun, 2015

911

ვიცე-პრემიერი, ეკონომიკისა და მდგრადი განვითარების მინისტრი, გიორგი კვირიკაშვილი აცხადებს, რომ ქვეყანაში შექმნილი მდგომარეობის გამო, ციფრულ მაუწყებლობაზე გადასვლის თარიღი შეიცვალა და 17 ივნისის ნაცვლად, პირველი ივლისი განისაზღვრა.

როგორც გიორგი კვირიკაშვილმა დღეს გამართულ ბრიფინგზე განაცხადა, ინფრასტრუქტურა შექმნილია და ქვეყანა მზადაა ციფრულ მაუწყებლობაზე გადავიდეს. თუმცა მიმდინარე სტიქიურ მოვლენებთან დაკავშირებით, მიზანშეწონილად მიიჩნიეს მოსახლეობისთვის დამატებითი დისკომფორტი არ შეექმნათ, რომელმაც ისედაც უდიდესი სტრესი განიცადა.

ვიცე-პრემიერის ინფორმაციით, საქართველოს საერთაშორისო ხელშეკრულებებით აღებული აქვს ვალდებულება, რომ მიმდინარე წლის 17 ივნისს ციფრულ მაუწყებლობაზე გადავიდეს. ამისთვის, ეკონომიკის სამინისტრომ და ციფრული მაუწყებლობის სააგენტომ, კომუნიკაციების მარეგულირებელ კომისიასთან ერთად ძალიან დიდი სამუშაო გასწია.

„ვფიქრობთ, რომ ამ ეტაპზე, ციფრულ მაუწყებლობაზე გადასვლის თარიღად 17 ივნისის ნაცვლად ავიღოთ 1 ივლისი, რათა ორი კვირა გავიდეს საიმისოდ, რომ ქვეყანა გამოვიდეს ასეთი მდგომარეობიდან, საგანგებო რეჟიმიდან და უფრო დამშვიდებულ რეჟიმში მოხდეს აღნიშნული პროცესის განხორციელება“, - განაცხადა კვირიკაშვილმა.

მისივე თქმით, ანალოგური მაუწყებლობის გამორთვა დაიწყება თბილისიდან. მანამდე გაკეთდება კიდევ რამდენიმე განცხადება იმისათვის, რათა მოსახლეობამ შეძლოს უკეთ მომზადება და სეთ-თოფ-ბოქსის შეძენა, რაც აუცილებელია ციფრულ მაუწყებლობაზე გადასასვლელად.