,,მრცხვენია იმ ადამიანების გამო, ვისთვისაც ტრაგედიაც კი სპეკულაციის საბაბია“

სოც.მედია - 22:51, 14 Jun, 2015

4324

დღეს არაა თითის გაშვერის, პასუხისმგებლობის არიდების და გადაბრალების დრო! - თბილისში მომხდარ სტიქიურ უბედურებას სოციალურ ქსელში ეხმაურება ,,დემოკრატიული განვითარების ეროვნული ცენტრის“ ხელმძღვანელი მუხრან ბურჭულაძე.

,,მთელი გულით ვიზიარებ ჩვენი თანამოქალაქეების გულისტკივილს და ვუსამძიმრებ მათ იმ მძიმე შედეგს, რაც გამოიწვია სტიქიამ.

ეს დღე თითოეული ჩვენგანისთვის მძიმედ გათენდა, მაგრამ მამხნევებს ერთი - ძალიან მაგარი ხალხი ვართ ქართველები და სიტყვაც არ დასცდეს არავის აუგი!

მთელი დღის მანძილზე, საკუთარი ინიციატივით მოდიოდნენ ადამიანები დაზარალებულების დასახმარებლად და ქალაქის დაზიანებული ნაწილის დასალაგებლად. მოხალისეების ნაკადი არ წყდებოდა და ყველაზე მთავარი ისაა, რომ ამას არ დასჭირდა არავის მოწოდება და დავალება, ხალხმა შეძლო თვითორგანიზება. ამიტომაც გადავრჩებით და ეს მამხნევებს.

მინდა მადლობა ვუთხრა იმ ახალგაზრდებს ვინც თავდაუზოგავად შრომობდა საკმაოდ მძიმე პირობებში, ჩემთვის პატივი იყო თქვენთან ერთად დგომა.

მრცხვენია იმ ადამიანების გამო ვისთვისაც ტრაგედიაც კი სპეკულაციის საბაბია - ყველაფერს აქვს საზღვარი!

დღეს არაა თითის გაშვერის, პასუხისმგებლობის არიდების და გადაბრალების დრო!

სტიქიას რაც არ უნდა მომზადებული დახვდე, რთულია მასთან გამკლავება, ამიტომაც დაუშვა კანონმდებელმა ზოგიერთი სამართლებრივი პროცედურისას გამონაკლისი და ასეთ გარემოებას ეწოდა "დაუძლეველი ძალა"!

მთავარი ის კი არაა გადავაბრალოთ ვინმეს, არამედ ვისწავლოთ!“ - წერს ბურჭულაძე.