საქართველოს პრეზიდენტი ადმინისტრაციის უფროსის დავით პატარაიას წიგნის პრეზენტაციას დაესწრო

პოლიტიკა - 15:35, 13 Jun, 2015

1124

საქართველოს პრეზიდენტი ივანე ჯავახიშვილის სახელობის თბილისის სახელმწიფო უნივერსიტეტში პრეზიდენტის ადმინისტრაციის უფროსის, უნივერსიტეტის ასოცირებული პროფესორის დავით პატარაიას წიგნის „საერთაშორისო ურთიერთობები დისციპლინა და თეორია“ პრეზენტაციას დაესწრო და შეკრებილ საზოგადოებას სიტყვით მიმართა."ვულოცავ დათოს. მას აქვს დიდი უნარი, ერთდროულად იყოს ძალიან ინტენსიურ პოლიტიკურ ცხოვრებაში და მოახერხოს ასეთი სიღრმისეული ნაშრომის შექმნა. მე და ჩვენი მეგობრები, ვინც ერთად ვმუშაობთ, არაერთხელ შევსწრებივართ ამ წიგნზე მუშაობას თვითმფრინავში, მანქანასა და ურთულეს ვითარებაში. ვულოცავ ქართულ საზოგადოებას ამ ახალ შენაძენს და დარწმუნებული ვარ, რომ ეს ნაშრომი კიდევ უფრო გააძლიერებს ჩვენს ცოდნას და უნარებს ქვეყნისთვის მნიშვნელოვანი მიღწევების განსახორციელებლად", - განაცხადა გიორგი მარგველაშვილმა სიტყვით გამოსვლისას.წიგნის ავტორის, დავით პატარაიას თქმით კი, აღნიშნული წიგნი ჩაფიქრებულია, როგორც ერთგვარი მეცნიერული გზამკვლევი და შესაბამისად, მისი წაკითხვა ნებისმიერ მკითხველს შეუძლია, რომელიც საერთაშორისო ურთიერთობებითაა დაინტერესებული.
"საერთაშორისო ურთიერთობები ძალიან საინტერესო, და იმავდროულად რთული და კომპლექსური ფენომენია. საერთაშორისო ურთიერთობებს მეცნიერება სხვადასხვა რაკურსიდან იკვლევს – ფილოსოფიური, პოლიტოლოგიური, ფსიქოლოგიური, სამართლებრივი, ეკონომიკური და ა.შ. მაგრამ დისციპლინა საერთაშორისო ურთიერთობებს მთლიანობაში სწავლობს და ცდილობს წარმოსახოს მისი ერთი მთლიანი სურათი. ეს წიგნი სწორედ საერთაშორისო ურთიერთობების დისციპლინას და თეორიას ეხება. ასევე, ჩაფიქრებულია, რომ ის იყოს ერთგვარი მეცნიერული გზამკვლევი. ამდენად, არ არის აუცილებელი იყო ამ სფეროს სპეციალისტი. ნებისმიერ მკითხველს, რომელიც დაინტერესებულია საერთაშორისო ურთიერთობებით, თანდათანობით შეუძლია შეისწავლოს ეს სფერო და და მოხვდეს საერთაშორისო ურთიერთობების ძალიან საინტერესო სამყაროში", - აღნიშნა პატარაიამ.დავით პატარაია 2002 წლიდან იურდიული მეცნიერებათა დოქტორია; უკვე თითქმის ოცი წელია ეწევა პედაგოგიურ საქმიანობას ივანე ჯავახიშვილის სახელობის თბილისის სახელმწიფო უნივერსიტეტში. გამოქვეყნებული აქვს 10-ზე მეტი მეცნიერული ნაშრომი. წიგნზე „საერთაშორისო ურთიერთობები დისციპლინა და თეორია“ დავით პატარაია სამი წელი მუშაობდა. ნაშრომი განკუთვნილია სტუდენტებისთვის, საერთაშორისო ურთიერთობებისა და სამართლის სპეციალისტრებისთვის.