"თბილისის 14 ათასი მოქალაქე ზაჰესში, მცხეთის გავლით ჩადის"- მელია მერიას აკრიტიკებს

პოლიტიკა - 12:04, 13 Jun, 2015

2299

ნიკა მელიამ და ირაკლი აბესაძემ ზაჰესის დასახლებასთან არსებული სარკინიგზო გზაგამტარის და ხიდი-აკვედუკის სარეკონსტრუქციო სამუშაოების ის ადგილი მოინახულეს, რომელიც გასული 6თვის განმავლობაში უნდა დაწყებულიყო. ხელშეკრულება თბილისის მერიასა და შპს. "სამშენებლო კომერციულ კორპორაცია ხიდს" შორის 31.12.2014 წელს გაფორმდა და მის თანახმად,მიმწოდებელი ვალდებული იყო სამუშაოები ხელშეკრულების გაფორმებიდან არაუგვიანეს 7 კალენდრულ დღეში დაეწყო, თუმცა აღნიშნულ ადგილას სამუშაოები დღემდე არ დაწყებულა, რაცმოსახლეობის უკმაყოფილების მიზეზი ხდება.

ირაკლი აბესაძის თქმით ეს ფაქტი არის კიდევ ერთი კარგი მაგალითი თუ როგორი იფლანგება თბილისის ბიუჯეტი და მილიონობით ლარი ისე, რომ ვერ გვარდება მოსახლეობის პრობლემები, რომლებიც მათ აწუხებთ. "ხიდი უკვე შვიდ თვეზე მეტია ჩაკეტილია, ნახევარი სამუშაო შესრულებული უნდა იყოს, მაგრამ სამუშაოები არც კი დაწყებულა მაშინ, როცა 2 მილიონამდე ლარი უკვე გადახდილია. დავით ნარმანია მხოლოდ ფლანგავს ბიუჯეტის სახსრებს და ვერ ახერხებს ელემენტარული პრობლემების გადაჭრას."- განაცხადა აბესაძემ.

ნიკა მელიას განცხადებით მერიას არ აწუხებს, რომ 14 ათასი მოქალაქე ზაჰესში მცხეთის გავლით ჩადის

"შვიდი თვის წინ, დედაქალაქის მერიამ კომპანიას გაუფორმა ხელშეკრულება, რომლის თანახმადაც, ზაჰესის ორ ხიდს უნდა ჩატარებოდა სრული რეაბილიტაცია. გასულია შვიდი თვე, კომპანიას აღებული აქვს მილიონ შვიდასი ათასი ლარი და ჩვენ ვხედავთ, რომ თითი თითზე არ არის დაკარებული. მერიაში ვინმე წუხს იმაზე, რომ თბილისის 14 ათასი მოქალაქე ზაჰესში, მცხეთის გავლით ჩადის."- აღნიშნა ნიკა მელიამ და დედაქალაქის ხელმძღვანელობას ხიდის რეაბილიტაციის სწრაფად დასრულებისკენ მოუწოდა.