ოპოზიციამ თელავის საკრებულოს საქმე სააპელაციო სასამართლოში მოუგო

პოლიტიკა - 13:27, 11 Jun, 2015

1040

სააპელაციო სასამართლომ განაჩენი თელავის საკრებულოს ოპოზიციის წევრების სასარგებლოდ გამოიტანა. ამასთან დაკავშირებით „ერთიანი ნაციონალური მოძრაობა" განცხადებას ავრცელებს, რომელსაც „ნიუპოსტი“ უცვლელად გთავაზობთ.

„თვითმმართველი ქალაქის, თელავის მუნიციპალიტეტის საკრებულოს წევრებმა - ბადურ რევაზიშვილმა (ერთიანი ნაციონალური მოძრაობა), რევაზ არჯევანიძემ (ერთიანი ნაციონალური მოძრაობა) და ნიკა ვარდოშვილმა (ახალი მემარჯვენეები), 2014 წლის სექტემბერში, საკრებულოს იურიდიულ კომისიას ოპოზიციური ფრაქციის შექმნის მოთხოვნით მიმართეს. თუმცა, კომისიამ მათ მოთხოვნაზე უარი უთხრა. საკრებულომ აღნიშნული საკითხი კენჭისყრაზე ჩააგდო, რაც სრულიად უკანონო და არადემოკრატიული ქმედება იყო.

აღნიშნულმა პირებმა, მათი მოთხოვნის უკანონო უგულვებელყოფა, თელავის რაიონულ სასამართლოში გაასაჩივრეს და კომისიის დასკვნის, საკრებულოს გადაწყვეტილებისა და ამ საქმესთან დაკავშირებული აქტებისა თუ ბრძანებების ბათილად ცნობა მოითხოვეს. ასევე, ზემოთ ხსენებული წევრების მოთხოვნის შესაბამისად ფრაქციის რეგისტრაციის დაუყოვნებლივ შესრულება. მიმდინარე წლის 10 იანვარს, სასამართლომ სრულად დააკმაყოფილა სარჩელი. კერძოდ, გააუქმა საქმესთან დაკავშირებული საკრებულოს მიერ მიღებული გადაწყვეტილება, დასკვნა თუ ბრძანება და საკრებულოს ფრაქციის რეგისტრაცია დაავალა. თელავის რაიონულმა სასამართლომ საკრებულოს ბაჟის გადახდაც დააკისრა.

ბადურ რევაზიშვილი, რევაზ არჯევანიძე და ნიკა ვარდოშვილი მიიჩნევენ, რომ ეს იყო აბსოლუტურად კანონიერი და სამართლიანი გადაწყვეტილება. თუმცა თელავის მუნიციპალიტეტის საკრებულომ გადაწყვეტილება არასამართლიანად მიიჩნია და ის სააპელაციო სასამართლოში გაასაჩივრა. შედეგი ამჯერადაც უცვლელი დარჩა. 2015 წლის 29 მაისს სააპელაციო სასამართლომ პირველი ინსტანციის გადაწყვეტილება უცვლელად დატოვა.

საკრებულო აპირებს არ გაჩერდეს და გადაწყვეტილება უზენაეს სასამართლოში გაასაჩივროს და თავისი უმეცრებით, კიდევ ერთხელ შეირცხვინოს თავი ამომრჩევლისა თუ სხვადსხვა ადგილობრივი და საერთშორისო არასამთავრობო ორგნიზაციების წინაშე, რაც ნამდვილად არ წაადგება ჩვენი ქვეყნის ერთიან ევროპულ ოჯახში ინტეგრაციის პროცესს.

აქ უმნიშვნელოვანესია ის ფაქტი, რომ თელავის საკრებულოში ამ დრომდე არცერთი ფრაქცია არ არსებობს, რაც ყოვლად დაუშვებლად მიიჩნევა საზოგადოებისა და იმ არასამთავრობო სექტორის მხრიდან, რომლებიც ფრაქციების მუშაობის გაუმჯობესებისა და ზოგადად საკრებულოების ეფექტურობის ასამაღლებლად უმარავ პროგრამებს ახორციელებენ. ასევე აღიქმება არადემოკრატიულად.

როგორც ჩანს ადგილობრივ თვითმმართველობას საკრებულოში ძლიერი ოპოზიციური ფრაქციის არსებობა არ აწყობს და ყველა ღონეს ხმარობს მათ ჩამოყალიბებას ხელი შეუშალოს, რითაც საკრებულოს წევრების უფლებებსა და ზოგადად დემოკრატიულობის პრინციპებს არღვევს,“-ნათქვამია "ნაციონალური მოძრაობის" მიერ გავრცელებულ განცხადებაში.