2015 წლის ბიუჯეტის კორექტირებული ვარიანტი კვლავ უცნობია

პოლიტიკა - 12:45, 11 Jun, 2015

936

2015 წლის საფინანსო ბიუჯეტის კორექტირებულ ვარიანტთან დაკავშირებით კონსულტაციები მინისტრებთან კვლავ გაგრძელდება. მთავრობის სხდომის დასრულების შემდეგ ფინანსთა მინისტრმა ნოდარ ხადურმა კომენტარი გააკეთა და აღნიშნა, რომ ბიუჯეტის კორექტირებული ნაწილის შესახებ დეტალური ინფორმაცია მომავალ კვირაში გახდება ცნობილი.

ხადურის თქმით, ეკონომიკური ზრდა 5%-ის ნაცვლად 2%-ით იქნება გათვალისწინებული.

„ერთი რამ, რაც დღეს ნამდვილად გადაწყვეტილია, არის ის, რომ შემცირდება სახაზინო ვალდებულების ემისია 100 მილიონი ლარით. ჩვენ მივიღეთ დავალება, რომ გავაგრძელოთ კონსულტაციები მინისტრებთან და მომავალ კვირაში წარმოვადგინოთ უკვე დაზუსტებული მონაცემები, თუ რომელ სამინისტროს რა მიმართულებით ექნება ან ეკონომია, ან პირიქით. ეს არ ითვალისწინებს მხოლოდ შემცირებას, შესაძლოა რომელიმე მიმართულებით ჩვენ ბიუჯეტი გავზარდოთ კიდეც.

ჩვენ ამ დღეების განმავლობაში გვექნება აქტიური კომუნიკაცია ადგილობრივ თვითმმართველობებთან, იმავე მიმართულებით, რომ გადახედონ ბიუჯეტს, რათა მიღწეული იყოს მთავარი პირობა და სახელმწიფო ბიუჯეტის დეფიციტი არ აღემატებოდეს მთლიანი შიდა პრდუქტის 3 %-ს. “ - განაცხადა ნოდარ ხადურმა.