,,მიმართვა გუბაზ სანიკიძეს, ზვიად ძიძიგურს და რესპუბლიკელებს“ - ოპოზიცია საარჩევნო სისტემის შეცვლას ითხოვს

პოლიტიკა - 13:05, 10 Jun, 2015

558

ინტერპარტიული ჯგუფის წევრებმა მომავალ სამოქმედო გეგმაზე იმსჯელეს. ისინი მოუწოდებენ ხელისუფლებას და საპარლამენტო უმრავლესობას, რომ ხელი მოაწერონ საკანონმდებლო ინიციატივას, რომელიც 15 პოლიტიკური პარტიის და 9 არასამთავრობო ორგანიზაციის სახელით უკვე შესულია პარლამენტში.

არასაპარლამენტო ოპოზიციის წარმომადგენლები მიმართავენ, უმრავლესობის წევრებს, რომლებიც თავის დროზე საარჩევნო სისტემის შეცვლას ითხოვდნენ, რომ გაიხსენონ თავისი მოთხოვნები და ხელისუფლებაში ყოფნის დროს მხარი დაუჭირონ ცვლილებებს.

,,მინდა მივმართო სახელისუფლო პარტიებსა და ფრაქციებს, რომ გაიაზრონ საჭიროება ამ ცვლილებისა, მინდა მივმართო ბატონ გუბაზ სანიკიძეს და ზვიად ძიძიგურს, რომ ერთგულნი დარჩნენ თავისი პრინციპების, მინდა მივმართო რესპუბლიკელებს, რომლებიც ბევრი წლის განმავლობასი იბძვიან ამისათვის, და ეხლა არის დრო როცა ამ ცვლილების გატარება შეგვიძლია, გავაერთიანოთ ძალისხმევა იმისათვის, რომ შევცვალოთ მახინჯი მაჟორიტარული სისტემა“ - განაცხადა მამუკა კაციტაძემ ,,ნიუპოსტთან“.

,,ეს არის ყველა ის ბერკეტი, რომლის ამოქმედებაც შესაძლებელია უპირველესად პარლამენტში, ადგილობრივი თვითმმართველობების დონეზე და ყველა ამ მიმართულებით ჩვენ სამოქალაქო თანხმობით გაერთიანებული ძალები ვაპირებთ ხელისუფლების სრულ პარალიზებას და ხელისუფლება ამას იგრძნობს თავის თავზე“ - განაცხადა გიორგი ახველდიანმა.