გურიაში „პატრიოტთა ალიანსის“ ლიდერი „თავისუფალ საქართველოში გადავიდა

პოლიტიკა - 13:34, 10 Jun, 2015

1334

„საქართველოს პატრიოტთა ალიანსის“ გურიის ორგანიზაციის დამფუძნებელი და ხელმძღვანელი, ქალაქ ოზურგეთის საკრებულოს დეპუტატი, გოჩა ძიმისტარიშვილი, პარტიას პროტესტის ნიშნად ტოვებს და „თავისუფალ საქართველოში“ გადადის.

ამის შესახებ განცხადება, ძიმისტარიშვილმა, დღეს, ოზურგეთის დემოკრატიული ჩართულობის ცენტრში გამართულ, საგანგებო ბრიფინგზე გააკეთა.

ბრიფინგს, პარტია „თავისუფალი საქართველოს“ ლიდერი, კახა კუკავაც ესწრებოდა.

ძიმისტარიშვილის თქმით, პარტიის დატოვების ძირითადი მიზეზი, „პატრიოტთა ალიანსის“ ხელმძღვანელების დირექტივა გახდა-რომლის მიხედვითაც მას ადგილობრივი ხელისუფლების კრიტიკა აეკრძალა.

გოჩა ძიმისტარიშვილი; ქალაქ ოზურგეთის საკრებულოს დეპუტატი:“მე გახლდით „სქართველოს პატრიოტთა ალიანსის“ გურიის რეგიონული ორგანიზაციის დამფუძნებელი და ხელმძღვანელი, თავიდანვე ეს იყო ოპოზიციური პარტია და ჩვენ ყველაფერს ვაკეთებდით, რომ გვებრძოლა უსამართლობის წინააღმდეგ, თუმცა ადგილობრივი არჩევნების შემდეგ „პატრიოტთა ალიანსი“ გახდა „ქართული ოცნების“ სატელიტური პარტია.

ეს იყო მთავარი მიზეზი რის გამოც მე ვერ დავრჩებოდი ამ პარტიაში. მე ხშირად ვაკრიტიკებდი „ქართული ოცნების“ ადგილობრივ ფრთას, რაც არ მოსწონდა „პატრიოტთა ალიანსის“ ხელმძღვანელობას, გამაფრთხილეს, თუ არ დავანებებდი ხელისუფლების კრიტიკას თავს, გამრიცხავდნენ პარტიიდან. აი ეს იყო მთავარი მიზეზი.

„თავისუფალ საქართველოში“ გადავედი იმიტომ, რომ ბევრი მსმენია ბატონ კახაზე, ის ყოველთვის ებრძოდა უსამართლობას და დღეიდან მიხარია, რომ უსამართლობასტან ბრძოლას-მასთან ერთად გავაგრძელებ“.

კახა კუკავა; „თავისუფალი საქართველოს“ თავმჯდომარე:“ბატონი გოჩა ძიმისტარიშვილი გურიაში უხელმძღვანელებს პარტიულ ორგანიზაციას, ოზურგეთში და გურიაში ნამდვილად არ არის პარტიების სიმცირე, თუმცა როცა თბილისში პარტიის ლიდერები სიტყვით აკრიტიკებენ მტავრობას და მმართველ კოალიციას, მათი წარმომადგენლები ადგილებზე გარიგებებით არიან დაკავებულები. გურიაში „თავისუფალი დემოკრატები“ შეასრულებენ რეალური ოპოზიციის ფუნქციას და იმ პრიორიტეტებზე იმუშავებს, რომელზე საუბარსაც ყველა ფსევდოოპოზიციური პარტია ერიდება საუბარსაც კი.“

თეა იოსელიანი, გურია