პლენარულ სხდომაზე შინაგან საქმეთა სამინისტროს რეფორმირებაზე იმსჯელებენ. დეპუტატები პირველი მოსმენით განიხილავენ საკანონმდებლო პაკეტს, რომელიც შსს-დან უსაფრთხოების სამსახურის გამოყოფას გულისხმობს.

ცნობილია, რომ საპარლამენტო ოპოზიცია კანონპროექტს მხარს არ უჭერს.

„ხელისუფლებას აქვს მნიშვნელოვანი გავლენა სპეცსამსახურების საქმიანობაზე. ისინი ჩართული არიან პოლიტიკურ დევნაში და საზოგადოების მხრიდან მის მიმართ ნაკლები ნდობაა. ეს პროექტი, რომელიც დღეს წარმოდგენილია, არ პასუხობს იმ პრობლემებს, რომელიც არსებობს დღეს სისტემაში", - განაცხადა ლევან ბეჟაშვილმა.

განსხვავებული მოსაზრება აქვთ უმრავლესობის წევრებს. გია ჟორჟოლიანის თქმით, უწყების რეფორმირება მნივნელოვანია. რაც შეეხებათ, „თავისუფალი დემოკრატებს“, ირაკლი ჩიქოვანის თქმით, ისინი აღნიშნულ საკითხზე საკუთარ ინიციატივას წარადგენენ, რომლის მიხედვითაც შინაგან საქმეთა სამინისტრო, ისევე როგორც თავდაცვა, ვალდებული იქნება სახელმწიფო შესყიდვების შესახებ ინფორმაცია პარლამენტს მიაწოდოს.