რუსეთის საგარეო უწყების განცხადებას საქართველოს საგარეო საქმეთა სამინისტროში ეხმაურებიან და რუსეთის შემოთავაზებას ცინიკურს უწოდებენ.

უწყების პრესსპიკერის დავით კერესელიძის თქმით, ანგარიშის გაცნობა ნათელყოფს, რომ რუსეთის საგარეო უწყების უკმაყოფილების ძირითადი მიზეზი მაინც საქართველოს ევროპული და ევროატლანტიკური ორიენტაციაა.

„რუსეთის საგარეო უწყება ტრადიციულად აგრძელებს საქართველოს წინააღმდეგ 2008 წელს განხორციელებული ფართომასშტაბიანი სამხედრო აგრესიის შედეგად წარმოქმნილი საკუთარი რეალობის ტირაჟირებას და ჯიუტად მოიხსენიებს საქართველოს განუყოფელ ნაწილებს - აფხაზეთსა და ცხინვალის რეგიონს „დამოუკიდებელ რესპუბლიკებად“. ამასთან, კრემლი ცინიკურად სთავაზობს ქართულ მხარეს საკუთარ რეგიონებთან გააფორმოს დოკუმენტი ძალის არგამოყენების შესახებ. გაუგებარია დოკუმენტის ტონი იმასთან დაკავშირებით, რომ საქართველო კვლავაც ოკუპირებულ ტერიტორიებად მიიჩნევს აფხაზეთსა და ცხინვალის რეგიონს, რომლებიც რუსეთის მიერვე არის ოკუპირებული. საერთაშორისო სამართლის ნორმებისა და პრინციპების უგულვებელყოფა და იგნორირება სამწუხაროდ რუსეთის საგარეო უწყებისათვის დამახასიათებელ საფირმო ნიშნად იქცა, რის შესახებაც მხოლოდ წუხილი შეიძლება გამოვთქვათ.

ანგარიშის გაცნობა ნათელყოფს, რომ რუსეთის საგარეო უწყების უკმაყოფილების ძირითადი მიზეზი მაინც საქართველოს ევროპული და ევროატლანტიკური ორიენტაციაა. ნებისმიერ სახელმწიფოს აქვს სუვერენული უფლება აირჩიოს, თუ რომელ გაერთიანებაში ან ალიანსში მიიღოს მონაწილეობა, ხოლო სწრაფვა ევროპულ და ევროატლანტიკურ ორგანიზაციებში წევრობისაკენ საქართველოს მოსახლეობის უმრავლესობის და პოლიტიკური სპექტრის არჩევანია“, - აცხადებს კერესელიძე.

რუსეთის საგარეო საქმეთა სამინისტროს მიერ გავრცელებულ განცხადებაში ნათქვამია, რომ საქართველო-რუსეთის ურთიერთობების ნორმალიზებას ხელს უშლის თბილისის პოზიცია აფხაზეთსა და სამხრეთ ოსეთთან დაკავშირებით, ასევე საქართველოს კურსი ევროკავშირსა და ნატო-ში ინტეგრაციისკენ.რაც შეეხება საქართველოსთან ურთიერთობას, ოფიციალური მოსკოვის განცხადებით, რუსეთის საგარეო საქმეთა სამინისტრო თბილისთან ჰუმანიტარული და საქმიანი კონტაქტების განვითარებას გეგმავს.