რუსეთთან ურთიერთობების საკითხებში პრემიერ-მინისტრის სპეციალური წარმომადგენელი ზურაბ აბაშიძე რუსეთის საგარეო უწყების განცხადებას ეხმაურება.

მისი თქმით, ამ პირობებში რუსეთთან დიპლომატიური ურთიერთობის აღდგენაზე საუბარი არარეალურია.

„ამ ვითარებაში როგორ შეიძლება დიპლომატიური ურთიერთობების აღდგენა, როდესაც ქვეყანა არ აღიარებს შენს ტერიტორიულ მთლიანობას და პირიქით, ხელს უწყობს ქვეყნის დაქსაქსულობას. თუმცა თუ დაიწყება პროცესი ამ პრობლემების მოსაგვარებლად, თუ მოხდება სერიოზული წინსვლა და გარღვევები აფხაზეთის და ცხინვალის რეგიონთან დაკავშირებული პრობლემის მოგვარების კუთხით, რაღაც ეტაპზე შეიძლება დადგეს საკითხი დიპლომატიური ურთიერთობის აღდგენის თვალსაზრისით, მაგრამ ამჯერად ეს არარეალურია“, - განაცხადა აბაშიძემ.

რუსეთის საგარეო საქმეთა სამინისტროს მიერ გავრცელებულ განცხადებაში ნათქვამია, რომ საქართველო-რუსეთის ურთიერთობების ნორმალიზებას ხელს უშლის თბილისის პოზიცია აფხაზეთსა და სამხრეთ ოსეთთან დაკავშირებით, ასევე საქართველოს კურსი ევროკავშირსა და ნატო-ში ინტეგრაციისკენ.