ბათუმში მდებარე ანბანის კოშკი ესპანურ კომპანია BOOST SPAIN-ს 20 წლით მართვის უფლებით 1 ლარად გადაეცა.

ამის შესახებ აჭარის მთავრობის თავმჯდომარემ არჩილ ხაბაძემ განაცხადა. მისი ინფორმაციით, კომპანიას ინფრასტრუქტურის მოწესრიგება მილიონ 200 ათასი ლარი დაჯდება.

როგორც ხაბაძემ განაცხადა, კოშკში და მის მიმდებარე ტერიტორიაზე რესტორნები და ღია კაფეები განთავსდება.

„ამ შენობას მოვუნახეთ პატრონი, რომელიც მის ფუნქციას შეინარჩუნებს და მოახდენს ტურისტული დანიშნულებით გამოყენებას. ვფიქრობ ეს არის სწორი გადაწყვეტილება. ამ კომპანიას ლიფტების მოწესრიგება მილიონ 200 ათასი ევრო დაუჯდება. კომპანია ყოველწლიურად გადაიხდის ქონების გადასახადს, კომუნალურ გადასახადებს და სხვა ხარჯებს, რაც მას დაახლოებით 700 000 ლარი დაუჯდება, დაასაქმებს ადგილობრივებს და წლების განმავლობაში უფუნქციოდ მდგარ შენობას გააცოცხლებს",- განაცხადა არჩილ ხაბაძემ.