მოკლული ლაშა მახარაძის დედა ნინო დიდებულიძე არასამთავრობო ორგანიზაციებს მოუწოდებს პრემიერ-მინისტრს ბოდიში მოუხადონ.

ამის მიზეზად დიდებულიძე მესამე სექტორის წარმომადგენლების მირ გუშინ გაკეთებულ განცხადებას ასახელებს და ამბობს, რომ არასამთავრობოებს საზოგადოება შეცდომაში შეჰყავთ.

"არ უნდა მოხდეს მისი ციხიდან გამოშვება. იმედია სამართლიანი მოსამართლეა, ვიცნობ მე მას. აგრეთვე მინდა მოვუწოდო არასამთავრობოებს, ნუ შეყავთ ხალხი შეცდომაში. ღარიბაშვილს მოუდახდონ ბოდიში, მას კანონი არ დაურღვევია და არც მოსამართლის გვარი დაუსახელებია. მე ვამბობ, რომ ოქროპირიძე არ უნდა გამოუშვან", - აცხადებს ნინო დიდებულიძე.

შეგახსენებთ, პრემიერ-მინისტრმა განაცხადა, რომ ნაფიც მსაჯულთა ინსტიტუტმა სრული კრახი განიცადა. ლაშა მახარაძის საქმის კომენტირებისას ირაკლი ღარიბაშვილმა აღნიშნა, რომ დაზარალებულის ოჯახს აქვს აბსოლუტურად სრული სამართლიანი მოთხოვნა, რომ დამნაშავე დაისაჯოს.

ახალგაზრდა იურისტთა ასოციაციამ მოგვიანებით გაავრცელა განცხადება, სადაც ნათქვამია, რომ აღნიშნული განცხადებით პრემიერმა დაარღვია გიორგი ოქროპირიძის უდანაშაულობის პრეზუმპცია, რაც საქართველოს კონსტიტუციით გარანტირებული უფლებაა.