"თავისუფალი დემოკრატების" ლიდერი ირაკლი ალასანია ე.წ. კაბელების საქმეზე გენერალური აუდიტის დასკვნას ეხმაურება და ამბობს, რომ მთავარი აუდიტორი ლაშა თორდია პროკურატურის დაკვეთას ასრულებს.

ამის შესახებ ალასანიამ ჟურნალისტებთან საუბრისას განაცხადა.
„სასამართლოს გადაწყვეტილების შემდეგ ამ ადამიანის უეცარი გამოჩენა, გვაფიქრებინებს, რომ იგი პროკურატურის დაკვეთას ასრულებს. სასამართლომ ამაზე იმსჯელა და შეაფასა ის დარღვევა რაც მასალებში იყო. აქ სიახლე არაფერია. ეს არის პიარკამპანია, რომელშიც იყენებენ ლაშა თორდიას. თავდაცვის სამინისტროში აუდიტის პალატის შემოსვლა ჩემს მიერ იყო ინიცირებული, მაგრამ ამ ბატონს სიმართლე და ტყუილი ერთმანეთში არეული აქვს“, - განაცხადა ალასანიამ.

სახელმწიფო აუდიტის სამსახურის ხელმძღვანელი ლაშა თორდია ე.წ კაბელების საქმეში არსებულ დარღვევებზე საუბრობს. ლაშა თორდას თქმით, ე.წ. კაბელების საქმესთან დაკავშირებით ჩატარებულ ტენდერში, სახელმწიფო აუდიტის სამსახურმა გარკვეული დარღვევები აღმოაჩინა. თორდია აცხადებს, რომ ამასთან დაკავშირებით მასალები უკვე გადაიგზავნა პროკურატურაში.