აფხაზეთის დე ფაქტო რესპუბლიკის განათლების და მეცნიერების ე.წ. მინისტრის მოდაგილემ, დიმიტრი გვარამიამ Sputnik-თან ინტერვიუში განაცხადა, რომ გალის რაიონის ყველა სკოლა სწავლების აფხაზურ სტანდარტზე გადავა. გვარამიას თქმით, საქმე იმაში კი არ არის, რომ ამ სკოლებში სწავლება ქართულად მიმდინარეობს, არამედ იმაში, რომ სასწავლო მასალას საქართველოს განათლების დეპარტამენტი გამოსცემს.

“საქართველოს განათლების დეპარტამენტის მიერ გამოცემულ სახელმძღვანელოებს გარკვეული იდეოლოგიური დატვირთვა აქვთ. ეს არათუ საზიანოა აფხაზეთის მოსახლეობისთის, არამედ საშიშია სახელმწიფოსთვის” - განაცხადა გვარამიამ.

მისივე თქმით, ცნობილია ფაქტები, როდესაც მასწავლებელის ნაწილი ხელფასს საქართველოშიც იღებდა, ეს კი საქართველოს ხელისუფლების მიზანმიმართულ პოლიტიკაზე მიუთითებს. გვარამიას თმიქთ, აფხაზეთის ტერიტორიაზე ამ პოლიტიკის შეწყვეტა აუცილებელია და ამისთვის, ქართული პროგრამით სწავლების პროცესი უნდა შეჩერდეს და დასძინა, რომ თუ საუბარია გალის რაიონის დაბალ ზონაზე, ეს სუფთა სახის ქართული საგნმანათლებლო პროგრამაა.

“ბუნებრივია, იმ საშუალო სკოლების კურსდამთავრებულები, რომლებიც ამ პროგრამას გადიან, უმაღლესი განათლების მიღებას აფხაზეთში არ გეგმავენ და ბევრი მათგანი უმაღლესი განათლების მისაღებად საქართველოში მიემგზავრება“- აღნიშნა მან.

გვარამიას თქმით,დე ფაქტო აფხაზეთის განათლებისა და მეცნიერების ე.წ. სამინისტროს მოთხოვნა აფხაზური საგანმანათლებლო სტანდარტის დამკვიდრების შესახებ შესრულდება.

„ამოიცანა ადვილი ნამდვილად არ არის. პედაგოგების გადამზადება საკმაოდ რთული პროცესი იქნება, რადგან მათი უმრავლესობა რუსულ ჯეროვნად ვერ ფლობს, საგნების სწავლებაზე ხომ საუბარი ზედმეტია “ - განაცხადა გვარამიამ.