"შეწყდეს საქართველოს უსაფრთხოების ხარჯზე ქულების დაწერა"

"შეწყდეს საქართველოს უსაფრთხოების ხარჯზე ქულების დაწერა" - შაშკინის პასუხი ხიდაშელს

პოლიტიკა - 16:04, 06 Jun, 2015

2115

თავდაცვის მინისტრის თინა ხიდაშელის განცხადებას, რომ სამინისტროში აღმოჩენილია აპარატურა, რომელიც ბიძინა ივანიშვილის რეზიდენციის მოსასმენად იყო განკუთვნილი თავდაცვის ყოფილი მინისტრი დიმიტრი შაშკინი გამოეხმაურა.

როგორც შაშკინმა „ნიუპოსტთან“ საუბრისას განაცხადა, თავდაცვის სამინისტროს სტრუქტურაში შედის დაზვერვის დეპარტამენტი, რომელიც შესაბამისი აპარატურით არის აღჭურვილი. თავდაცვის ყოფილმა მინისტრის თქმით, არ არსებობს აპარატურა, რომელიც ერთი კონკრეტული ადამიანის წინააღმდეგ გამოყენებისთვის არის შექმნილი. მისივე განცხადებით, ამ საკითხით სპეკულირება საქართველოს უსაფრთხოებას და თავდაცვისუნარიანობას უქმნის საფრთხეს.

დიმირტი შაშკინმა პოლიტიკოსებს საქართველოს უსაფრთხოების ხარჯზე პოლიტიკური ქულების დაწერის მცდელობისგან თავის შეკავებისკენ მოუწოდა.

„საქართველოს თავდაცვის სამინისტროს სტრუქტურაში საქართველოს კანონმდებლობის მიხედვით, შედის დაზვრევის დეპარტამენტი და ეს არ არის საიდუმლო. ეს არის ისეთივე დაზვრევის დეპრტამენტი, როგორიც არის ამერიკის თავდაცვის სამინისტროში შემავალი „დიაიეი“ და როგორც არის „გრუ“ რუსეთში. დაზვრევის დეპარტამენტი ბუნებრივია აღჭურვილია სპეციალური აპარატურით, რომ შეასრულოს ვალდებულებები და მოვალეობები, რომელიც მას კანონმდებლობით ეკისრება, იმისთვის, რომ დაიცვას საქართველოს უსაფრთხოება და ტერიტორიული მთლიანობა.

სამწუხაროა, რომ უკვე სამი წელია ხდება ამ საკითხებით მანიპულირება, ეს ბუნებრივია ავნებს საქართველოს უსაფრთხეობას და თავდაცვითუანარიანობას. ბუნებაში არ არსებობს აპარატურა, რომელიც შეიძლება გამიზნული იყოს ერთი ადამიანის წინააღდეგ. კიდევ ერთხელ ხაზს ვუსვამ, რომ საქართველოს კანონმდებლობის დაცვით, თავდაცვის სამინისტროს გააჩნია სპეციალური აპარატურა, რომელიც არის საჭირო საქართველოს ტერიტორიული დაცვის უზრუნველსაყოფად.

მე კიდევ ერთხელ მოვუწოდებ ყველას, ვისაც ეს ეხება, შეწყდეს სპეკულირება და საქართველოს უსაფრთხოების ხარჯზე პოლიტიკური ქულების დაწერა. ეს ყველაფერი ავნებს ჩვენი ქვეყნის უსაფრთხოებას,“-განაცხადა დიმიტრი შაშკინმა.

შეგახსენებთ, თავდაცვის მინისტრის თინა ხიდაშელის მიერ გავრცელებული ინფორმაციით, წინა ხელსიუფლების დროს თავდაცვის სამინისტროს ბიუჯეტიდან შეძენილია მოწყობილობა, რომლის დანიშნულებაც ბიძინა ივანიშვილის რეზიდენციის მოსმენა იყო.