„ახალი მემარჯვენეების“ ერთ-ერთი ლიდერი მამუკა კაციტაძე მაჟორიტარული სისტემის შეცვლასთან დაკავშირებით ბიძინა ივანიშვილის განცხადებას იმედიანად უყურებს.

როგორც კაციტაძემ „ნიუპოსტთან“ საუბარში განაცხადა, ამ საკითხზე ექსპრემიერის მოსაზრება მნიშვნელოვანია, რადგან მისი აზრი კოალიციაში და მმართველ გუნდში გასათვალისწინებელია.

„მაჟორიტარული სისტემის შეცვლა საკონსტიტუციო სასამართლომ პრაქტიკულად უკვე გადაწყვიტა და აქედან გამომდინარე, ეს კოალიცია „ქართული ოცნების“ თავისუფალ ნებად ვეღარ ჩაითვლება. ეს უკვე მათი ვალდებულებაა. თუ ზოგადად საუბარია მაჟორიტარული სისტემის შეცვლაზე ამას მკაფიოობა უნდა ახლდეს. კარგი იქნება ხელისუფლებამ თქვას, ბოლოს და ბოლოს რას უჭერს მხარს. ბატონი ივანიშვილი პოზიცია ამ საკითხთან დაკავშირებით უაღრესად მნიშვნელოვანია, რადგან მისი პოზიცია კოალიციაში მეორე და მეათეხარისხოვანი არ არის და ის მნიშვნელოვანწილად განსაზვრავს კოალიციის ხედვასა და პოზიციას. ამიტომ, ჩვენი მხრიდან მოლოდინი მის მკაფიო პოზიციასთან დაკავშირებით მნიშვნელოვანია. კარგი იქნება თუ ივანიშვილი, როგორც საქართველოს მოქალაქე და არასამთავრობო ორგანიზაციის წარმომადგენელი საკუთარ პოზიციას მკაფიოდ იტყვის, არა პრინციპის არამედ კონკრეტული ფორმულის დონეზე და ამით ხელს შეუწყობს იმას, რომ რეალურად მოხდეს იმ სისტემის შეცვლა, რაც სიმახინჯეს წარმოადგენს ქართული საარჩევნო გარემოსათვის. ცუდია, რომ დუმილი გრძელდება ამდენი ხნის განმავლობაში. დაველოდოთ მოვლენებს“, - განაცხადა კაციტაძემ.

ექსპრემიერმა ბიძინა ივანიშვილმა ცოტა ხნის წინ გააკეთა განცხადება, რომ მაჟორიტარული სისტემის შეცვლის მომხრეა. მისი თქმით, აღნიშნულ საკითხზე უმრაველსობა გადაწყვეტილებას უახლოეს დღეებში მიიღებს.