,,კაცი, რომ ივანიშვილს კორუფციაში დაადანაშაულებს, ზნედაცემულია“

,,კაცი, რომ ივანიშვილს კორუფციაში დაადანაშაულებს, ზნედაცემულია“ - ბრეგაძე სააკაშვილზე

პოლიტიკა - 19:36, 03 Jun, 2015

1779

დიასპორის საკითხებში სახელმწიფო მინისტრის მოადგილე სანდრო ბრეგაძე, მიხეილ სააკაშვილი გუშინელ ინტერვიუს ეხმაურება და აცხადებს, რომ "ნაციონალური მოძრაობა" მის ლიდერთან ერთად ხელისუფლებაში ვერ მობრუნდება.

ბრეგაძის განცხადებით ივანიშვილის დროინდელ მთავრობას შესაძლოა, საგარეო თუ საშინაო, ეკონომიკურ, თუნდაც საკადრო საკითხში გაუწიო ოპონირება, მაგრამ მისთვის კორუფციისა და სახელმწიფოს ხარჯზე გამდიდრების სურვილის დაბრალება, ზნედაცემულობა, უმადურობა და მანიაკალიზმია.

„მაქსიმალურად თავს ვიკავებდი, რომ ჩაძირული გემის მღრღნელებისთვის, „ნაცმოძრაობიდან" პასუხი გამეცა. წაქცეულები არიან და წაქცეულზე წიხლის მიყოლება არაა მოსაწონი, მაგრამ ვითმინე, ვითმინე, ვითმინე და სააკაშვილის გუშინდელმა, ბოღმითა და ღვარძლით ნაცოდვილარმა ინტერვიუმ მოთმინების ფიალა აავსო. წაქცეული ნაცების ადგილზე, ნებისმიერი სხვა თავად მოსთხოვდა პასუხს სააკაშვილს, რადგან მისი ეგზალტირებული ინტერვიუები კიდევ უფრო აძლიერებს აგრესიას ნაცების მიმართ და მუდმივად ახსენებს, ზოგჯერ მივიწყებულ მათ დანაშაულებს საზოგადოებას. თითქოსდა მთელ ქართველ საზოგადოებას მოუწოდებს სააკაშვილი, რომ აგერ ჩემი ყოფილი თანამებრძოლები ჩემთვის საზარბაზნე ხორცია და რაც გინდათ, ის უყავითო. სხვას ვერაფერს მიაწერ გუშინდელ ინტერვიუში ხალხისთვის იმის შეხსენებას, რომ 9 წელი მანიაკთა ბანდა მართავდა ქვეყანას. ვუცქერდი უტიფრობითა და ხელისუფლებაში დაბრუნების მანიაკალური სურვილით შეპყრობილ ამ კაცუნას და თავისთავად გონებაში ამომიტივტივდა ყველა ის ამაზრზენი რამ, რაც მისი მმართველობის 9 წლის მანძილზე სუფევდა. თუმცა „კომკავშირული" უტიფრობა ყველაზე ამაზრზენი რამ იყო, რაც მოვისმინეთ. კაცი რომ ბიძინა ივანიშვილს საქართველოში გამდიდრების სურვილს დააბრალებს და კორუფციაში დაადანაშაულებს, მარტო უტიფარი კი არ არის, ზნედაცემული და ყველაფრის მკადრებელია. შესაძლოა, საგარეო თუ საშინაო, ეკონომიკურ, თუნდაც საკადრო საკითხში გაუწიო ოპონირება ბატონი ივანიშვილის დროინდელ მთავრობას, მაგრამ კაცს, რომელიც მილიარდებს ხარჯავს ქველმოქმედებაში, რომელიც მსოფლიოს ერთ-ერთი ყველაზე წარმატებული ბიზნესმენი და უმდიდრესი პიროვნება გახლდათ ხელისუფლებაში მოსვლამდე, დააბრალო კორუფცია თუ სახელმწიფოს ხარჯზე გამდიდრების სურვილი, ზნედაცემულობა, უმადურობა და მანიაკალიზმია, სხვა უფრო უარესი თუ არა", - განაცხადა ბრეგაძემ.

დიასპორის საკითხებში სახელმწიფო მინისტრის მოადგილე, ყოფილ პრეზიდენტს წარსულს ახსებნებს და აცხადებს, რომ მას მაინც ახსოვს როგორ მოვიდნენ ხელისუფლებაში და რამდენი მილიონი იშოვეს ქვეყნის სათავეში ყოფნისას.

"ყველაზე სამწუხარო კი ისაა, რომ სააკაშვილსაც და მის მაქებარ ჟურნალისტებსაც ქართველი საზოგადოება იმდენად უჭკუო და განუვითარებელი ჰგონიათ, რომ სჯერათ, მათ ნათქვამს დაიჯერებს, მიშას მოინატრებს და მანიაკთა ბანდას ხელისუფლებაში დააბრუნებს. ტყუილია, მიშა, შენი მანიაკალური იმედები, რომ ოდესმე დაბრუნდები. უბრალოდ, უკრაინა და ოდესა მებრალება, რადგან ვიცი, შენი იქ ყოფნით რა უდიდესი საფრთხის წინაშეა ჩვენი მოძმე უკრაინელი ხალხი. იმედია, ისინიც მალე მოიშორებენ სახადს, რომელსაც სახელად შენი სახელი ეწოდება", - განაცხადა ბრეგაძემ.