„არა რკინიგზის აფხაზეთის მონაკვეთის გახსნას”! - პაატა დავითაია facebook აქციას იწყებს

პოლიტიკა - 14:04, 03 Jun, 2015

1221

პარტია „საქართველოს ევროპელი დემოკრატების“ თავმჯდომარე პაატა დავითაია მოუწოდებს საქართველოს მოსახლეობას უარი თქვან რკინიგზის აფხაზეთის მონაკვეთის გახსნაზე.

„საქართველოს მთავრობა აპირებს გაასხვისოს საქართველოს რკინიგზა. რუსეთის კომპანიები დაინტერესებულნი არიან საქართველოს რკინიგზის ყიდვით. სხვადასხვა მედია საშუალებებით კეთდება განცხადებები რუსეთის და სომხეთის მხრიდან, რომ მიმდინარეობს მოლაპარაკებები რკინიგზის-აფხაზეთის მონაკვეთის გახსნასთან დაკავშირებით. აღნიშნულ საკითხზე საუბრობს აფხაზეთის სეპარატისტული მთავრობაც. რუსეთის რკინიგზის დეპარტამენტის მიერ დაიწყო აღდგენითი სამუშაოები აფხაზეთის რკინიგზის მონაკვეთზე. გამომდინარე აქედან, ჩვენი მთავრობის რუსეთთან დიალოგის გაურკვეველ ფორმატებში (საუბარია კარასინი-აბაშიძის ფორმატზე) არ არის გამორიცხული განხორციელდეს აფხაზეთის რკინიგზის მონაკვეთის აღდგენა, რაც ეწინააღმდეგება საქართველოს ეროვნულ უსაფრთხოებას, იმიტომ რომ, საქართველოს იურისდიქცია არ ვრცელდება აფხაზეთის ტერიტორიაზე, დევნილები არ არიან თავიან სახლებში დაბრუნებულნი, აფხაზეთი აღიარებულია რუსეთის ფედერაციის მხრიდან, როგორც დამოუკიდებელი სახელმწიფო, ამიტომაც რკინიგზის აღდგენა ფაქტობრივად ნიშნავს საქართველოს მხრიდან აფხაზეთის დამოუკიდებლობის აღიარებას, რაც ყოვლად მიუღებელია და ეს შეიძლება მოხდეს ნებისმიერ დროს დღევანდელი ხელისუფლბის პირობებში. ამიტომ, ჩვენ პარტია „ევროპელი დემოკრატები“ ვიწყებთ აქციას facebook-ის სპეციალურად შექმნილი გვერდის საშუალებით „არა რკინიგზის ფხაზეთის მონაკვეთის გახსნას“.

ყველას, ვინც ეთანხმება ჩვენს მოსაზრებას, მოვუწოდებთ, შემოგვიერთდნენ, მოგვაწოდონ თავიანთი კოორდინატები, რათა შევძლოთ მათთან დაკავშირება. აქციის აზრი მდგომარეობს იმაში, რომ რკინიგზის აღდგენის შემთხვევაში მოვაწყოთ მჯდომარე აქცია ენგურის რკინიგზის ხიდზე და გადავკეტოთ ის, რათა არ მივცეთ მატარებელს რკინიგზაზე მოძრაობის საშუალება“,-აცხადებს პაატა დავითაია.