ევროკავშირი საქართველოს 65 მილიონი ევროს დახმარებას 100 მილიონამდე გაუზრდის

პოლიტიკა - 10:42, 03 Jun, 2015

978

თბილისში საქართველო-ევროკავშირის პოლიტიკური დიალოგის ფარგლებში საქართველო-ევროკავშირის ასოცირების კომიტეტის პირველი სხდომა გაიმართა, რომელიც ასოცირების შეთანხმების ამოქმედების შედეგად ჩამოყალიბებული საქართველო-ევროკავშირის პოლიტიკური დიალოგის ახალი ინსტიტუციური ჩარჩოს ნაწილია.

სხდომაზე განხილულ იქნა საქართველო-ევროკავშირის თანამშრომლობის აქტუალური საკითხები და პრიორიტეტები, მათ შორის ასოცირების შეთანხმების განხორციელების მიმდინარეობა; ქვეყანაში ბოლო პერიოდში მიღწეული პროგრესი დემოკრატიული რეფორმების კუთხით

სხდომაზე განსაკუთრებული ყურადღება დაეთმო საქართველოში უსაფრთხოების კუთხით არსებულ ვითარებას, მათ შორის ბოლო დროს ოკუპირებულ ტერიტორიებთან მიმართებაში განვითარებულ მოვლენებს და ქვეყანაში სტაბილურობის ხელშეწყობის მიზნით ევროკავშირის ჩართულობის გაძლიერების პერსპექტივებს. ამ კუთხით, ხაზი გაესვა ევროკავშირის მონიტორინგის მისიის, ჟენევის საერთაშორისო მოლაპარაკებათა და სამხრეთ კავკასიისა და საქართველოს კრიზისის საკითხებში ევროკავშირის სპეციალური წარმომადგენლის საქმიანობის მნიშვნელობას. ევროკავშირმა კიდევ ერთხელ დაადასტურა მხარდაჭერა საქართველოს ტერიტორიული მთლიანობის საერთაშორისოდ აღიარებულ საზღვრებში.
სხდომაზე, მხარეებმა, ასევე, განიხილეს ეკონომიკური თანამშრომლობის კუთხით მიმდინარე თანამშრომლობა; მათ შორის დარგობრივი თანამშრომლობის გაღრმავების შესაძლებლობები ტრანსპორტის, ენერგეტიკის, გარემოს დაცვის, სოფლის მეურნეობის, ჯანდაცვისა და რეგიონული განვითარების სფეროებში. სხდომაზე მხარეებმა გაცვალეს მოსაზრებები ევროინტეგრაციის საკითხებზე კომუნიკაციის ინტენსიფიკაციის საჭიროებაზე..

ასოცირების კომიტეტის შემდეგ გაიმართა კომიტეტის თანათავმჯდომარეების ერთობლივი პრეს-კონფერენცია, სადაც ევროკავშირის წარმომადგენელმა გუნარ ვიგანდიმ განცხადება საქართველოს ყოველწლიური 65 მილიონი ევროს დახმარების 100 მილიონამდე გაზრდის შესახებ გააკეთა.

პრესკონფერენციაზე განცხადება საქართველოს საგარეო საქმეთა მინისტრის მოადგილემ გიგი გიგიაძემაც გააკეთა და იმედი გამოთქვა, რომ კომისია საქართველოში დემოკრატიული რეფორმების კუთხით ბოლო პერიოდში მიღწეულ პროგრესს პოზიტიურად შეაფასებს. მისი თქმით მოლოდინია, რომ შემოდგომაზე საქართველოს ეწვევა ევროკავშირის ექსპერტთა შემფასებელი ჯგუფი.