,,მოლდოვაში ივნისში დაანონსებული პრემიერის ვიზიტი არ შედგება“

,,მოლდოვაში ივნისში დაანონსებული პრემიერის ვიზიტი არ შედგება“ - მამუკა კუდავა

პოლიტიკა - 21:13, 02 Jun, 2015

1270

საფრანგეთში საქართველოს ყოფილი ელჩის, მამუკა კუდავას ინფორმაციით, საქართველოს პრემიერის ივნისში დაანონსებული ვიზიტი მოლდოვაში არ შედგება. ამის შესახებ კუდავა საკუთარი ,,ფეისბუქის“ გვერდზე წერს. ყოფილი ელჩი ამბობს, რომ მან ინფორმაცია რუმინეთში ყოფნისას, მისი ერთ-ერთი კოლეგისგან მიიღო.

,,მოლდოვაში ივნისში დაანონსებული პრემიერის ვიზიტი არ შედგება. პრემიერის ადმინისტრაცია თარიღის დაზუსტებაზე საუბრობს.

არადა, ჩემი ინფორმაციით, რომელიც რუმინეთში ყოფნისას ერთ-ერთი მოლდოველი ნაცნობისგან მივიღე, საქართველოს პრემიერი უბრალოდ არ არის სასურველი სტუმარი, ამ ეტაპზე მაინც. რატომ? იმიტომ, რომ მისი და საერთოდ მთავრობის პოზიცია მეგობარი ქვეყნის მიმართ „სულელური და გაუგებარია“ (იგულისხმება საქართველოს მთავრობის უკმაყოფილება და სატელეფონო ზარები ყოფილი ქართველი მაღალჩინოსნების მოლდოვაში ვიზიტების და რეფორმებში დახმარების საკითხზე).

მოკლედ, ოცნების მთავრობამ საქართველოს ჯერ უკრაინასთან გაუფუჭა ურთიერთობები, შემდეგ - ირანთან, ეხლა უკვე - მოლდოვასთან. ამას დიპლომატიური კრახიც შეიძლება ეწოდოს, რაც ახლომხედველობითა და სახელმწიფო სტრატეგიულ ინტერესებში პრიორიტეტების აღრევითაა გამოწვეული“ - წერს მამუკა კუდავა.

გასულ კვირას საქართველოს მთავრობის მიერ გავრცელდა ინფორმაიცა, რომლის თანახმადაც, მოლდოვას პრემიერ-მინისტრმა ირაკლი ღარიბაშვილი ვიზიტით მიიწვია. პრემიერის ადმინისტრაციის მიერ ვიზიტის დრო ივნისი სახელდებოდა. თუმცა თაირღი ამ დრომდე დაზუტებული არ არის.