"ევროკავშირი გთავაზობთ შესაძლებლობებს, რომ სახელმწიფო ააშენოთ"- ესტონეთის პრეზიდენტი

პოლიტიკა - 20:29, 02 Jun, 2015

522

საქართველოში ვიზიტად მყოფმა ესტონეთის პრეზიდენტმა ტოომას ჰენდრიკ ილვესმა საქართველოს ევროპულ პერსპექტივაზე და იმ ნაბიჯებზე ისაუბრა, რომელიც საქართველომ ევროპული ინტეგრაციის მისაღწევად უნდა გადადგას. ესტონეთის პრეზიდენტმა რიგის სამიტს დადებითად შეაფასა და და იმედი გამოთქვა რომ ვიზალიბერალიზაციის საკითხზე საქართველოსთან დაკავშირებით პოზიტიური გადაწყვეტილებები 2015 წლის ბოლომდე იქნება მიღებული. ილვესმა ევროკავშირთან ასოცირების შეთანხმების დადებით შედეგებზეც ისაუბრა:

„საქართველოსთვის ძალიან კარგი ინსტრუმენტია ასოცირების შეთანხმება და ღრმა და ყოვლისმომცველი თავისუფალი ვაჭრობის შესახებ მისი კომპონენტი. ეს არის ის ინსტრუმენტი, რომელიც უფრო ახლოს მიგიყვანთ ევროკავშირთან. რასაკვირველია, შეთანხება იძლევა ახალ რესურსებს, რომელიც საქართველოს განკარგულებაშია. შეთანხმების იმპლემენტაციის შემდეგ პირველ 6 თვეში – სექტემბრიდან მარტამდე საქართველოდან ექსპორტი ევროპულ ქვეყნებში 12 პროცენტით გაიზარდა. ამიტომაც არის ამ შეთანხმების სავაჭრო ასპექტი ძალიან მნიშვნელოვანი.
უნდა ვიფიქროთ ევროინტეგრაციაზე, როგორც პროცესზე. რეალურად, ეს არის სახელმწიფოს მშენებლობის პროცესი, რაც იმას ნიშნავს, რომ ეს არის გამოყენება იმ შესაძლებლობებისა, რომელსაც ევროკავშირი გთავაზობთ, რომ სახელმწიფო ააშენოთ - ანუ სახელმწიფო სტრუქტურები უკეთესად ამუშავდნენ, მოხდეს სახელმწიფო სისტემის რეფორმა, კოორდინაციის გაზრდა სხვადასხვა სამინისტროს შორის, ხელისუფლების წარმომადგენლებს შორის. მაგალითად, ფიტოსანიტარული კონტროლი შეიძლება ძალიან მოსაწყენი თემაა, მაგრამ ეს გახლავთ ის დეტალი, რომელიც აუცილებელია, რათა დავრწმუნდეთ, რომ ჩვენი საკვები არის უსაფრთხო. ფიტოსანიტარული კონტროლი ჩრდილოელი მეზობლისგანაც გაქვთ დაწესებული, მაგრამ ეს სულ სხვა რამ არის. ჩვენ ამას არ ვგულისხმობთ", - განაცხადა ესტონეთის პრეზიდენტმა.