საკითხის ჩაგდების შემთხვევაში რითი უპასუხებს პრეზიდენტის რეზიდენციაში შემდგარი ერთობა

პოლიტიკა - 19:48, 01 Jun, 2015

1399

მმართველი გუნდის წევრების გადაწყვეტილება არასამთავრობო ორგანიზაციების მიერ საარჩევნო კოდექსში ინიცირებული ცვლილებებთან დაკავშირებით კვლავაც გაურკვეველია. მმართველი გუნდის დღევანდელ პოზიციას გამოხმაურება მოჰყვა არასაპარლამენტო ოპოზიციაში.

ეროვნულ-დემოკრატიულ პარტიაში ფიქრობენ, რომ მმართველ გუნდს აწყობს მაჟორიტარული არჩევნები. ბაჩუკი ქარდავას თქმით, მაჟორიტარი დეპუტატები ხელისუფლებისთვის არის საშუალება, დარჩნენ უმრავლესობაში.

"ეს უკვე აღარ არის პოლიტიკური ნებისა და გემოვნების საკითხი, ეს უკვე საზოგადოების ინტერესის სფეროა, რადგან ხალხმა იცის, რომ ცვლილებების ერთადერთი შესაძლებლობა არის სამართლიანი არჩევნები. ყველა ხელისუფლების პირობებში იყო მუდმივი ბრძოლა იმისათვის, რომ შეცვლილიყო საარჩევნო სისტემა. ,,ნაციონალური მოძრაობის“ ხელისუფლებაში ყოფნის პირობებში, სწრორედ დღევანდელი ხელისუფლების წარმომადგენლები, რომლებთან ერთადაც ჩვენ ვიყავით ოპოზიციაში, ჩვენთან ერთად ისინი ითხოვდნენ საარჩევნო სისტემის ცვლილებას, იმას, რაზეც დღეს უკვე უარს ამბობენ, საუბარია მაჟორიტარულ სისტემაზე. ხელისუფლებამ, რომელმაც იცის რომ შეიძლება საზოგადოების მხარდაჭერა დაკარგოს და ვერ მოიპოვოს დიდი მხარდაჭერა ის აქცენტს აკეთებს მარადიულ დეპუტატებზე, რომლებიც ყოველთვის არიან მისთვის მართვადები და არმოპოვებული ხმებით სურს მოიპოვოს უმრავლესობა საკანონმდებლო ორგანოში. ეს მარტივი ფორმულაა - ვერ იგებ არჩევნებს, მაგრამ გაქვს ძალა და ეს მარადიული დეპუტატები გაძლევენ იმის შანს, რომ იყო ხელისუფლებაში,"- აცხადებს ბაჩუკი ქარდავა.

ახალი მემარჯვენეები კი ფიქრობენ, რომ ხელისუფლებამ არასწორი გადაწყვეტილება მიიღო. მამუკა კაციტაძე ამბობს, რომ იმისათვის, რომ კანონზე მუშაობა დაიწყოს 2 გზა არსებობს.

"საკმაოდ დიდი რესურსი არსებობს იმისა, რომ ხელისუფლებამ ეს გადაწყვეტილება მიიღოს. ეს არის მათი დამოუკიდებელი პოლიტიკური ნება, ან პოლიტიკური ნება, რომელსაც განაპირობებს ბატონი ივანიშვილი, ეტყვის რა უმრავლესობას, რომ ასე გააკეთონ. არსებობს მეორე ვერსია, რონ საზოგადოების დიდმა ნაწილმა მოახიდნოს კონსოლიდაცია ამ სამართლიანი და დემოკრატიული სისტემის დასაცავად და აიძულონ ხელისუფლება, ნებით თუ არა, ძალით მაინც გააკეთონ."- აცხადებს მამუკა კაციტაძე.