თავდაცვის მინისტრი თინა ხიდაშელი ნატოს გენერალურ მდივანს იენს სტოლტენბერგს შეხვდა.

როგორც ხიდაშელმა განაცხადა, შეხვედრაზე ერთ-ერთი განსახილველი თემა საქართველოში ნატოს საწვრთნელი ცენტრის გახსნა იყო. მისივე თქმით, საუბარი შეეხო ასევე სტოლტენბერგის საქართველოში ვიზიტს.

„რა თქმა უნდა იყო საუბარი საწვრთნელ ცენტრზე, მისი ადგილმდებარეობა უკვე შერჩეულია და ბრიუსელში ველოდებით საბოლოო პასუხს. შესაძლოა ცენტრის გახსნა სიმბოლურად დავამთხვიოთ ნატოს გენერალური მდივნის საქართველოში ჩამოსვლის თარიღს. სტოლტენბერგი საქართველოში მიმდინარე წლის ბოლოს ჩამოვა“, - აღნიშნა ხიდაშელმა.

მისივე თქმით, საუბარი შეეხო ჰაერსაწინააღმდეგო თავდაცვითი შეიარაღებების მოწოდებასთან დაკავშირებულ მოლაპარაკებებსაც.

„დასადგენია მხოლოდ ტექნიკური საკითხები და ხელშეკრულებას ხელი ამ თვის ბოლომდე მოეწერება“, - აღნიშნა მინისტრმა.