"მკვლელობა კიდევ მოხდება"- ინაშვილი საქართველოში უკრაინელების შემოსვლის გაკონტროლებას ითხოვს

პოლიტიკა - 15:04, 01 Jun, 2015

4668

„პატრიოტთა ალიანსის“ ლიდერი ირმა ინაშვილი გაზეთ „ასავალ-დასავალთან“ „ნაციონალების“ ხელისუფლებაში დაბრუნების გზებზე საუბრობს და აცხადებს, რომ ამ მიზნის მისაღწევად „ნაციონალური მოძრობა“ ყველანაირ ხერხს გამოიყენებს:

„ნაციონალები ყველაფერზე არიან წამსვლელნი, მაგრამ არაფერი გამოუვათ. იმიტომ რომ ხალხის მხარდაჭერა არ აქვთ! სხვათა შორის თბილისში სხვადასხვა დისლოკაციის ადგილებში გადანაწილებულნი არიან ნაცმოძრაობის ძველი ზონდერები, რომლებსაც სერიოზული შეიარაღება გააჩნიათ და ხელისუფლება რატომღაც მათ ამ იარაღს არ ართმევს. მეტსაც გეტყვით, ბოლო პერიოდში საქართველოში მრავლად არიან შემოსულნი უკრაინელები და ხელისუფლებამ ყურადღება მიაქციოს, რა კატეგორიის ხალხი კვეთს საქართველოს საზღვარს, იმიტომ, რომ ეს უკრაინელები ტურისტებად შემოვიდნენ თუ „ბოევიკებად“ საკითხავია!

არ დაგვავიწყდეს, რომ უკანასკნელ პერიოდში თბილისში ორი დიდი ტრაგედია მოხდა, მოკლეს იური ვაზაგაშვილი და ბესო ხარძიანი! ხელისუფლების საყურადღებოდ ვამბობ- თბილისში კიდევ მოხდება ხმაურიანი პოლიტიკური მკვლელობა , რაც საქართველოში უმართავ პროცესებს გამოიწვევს. ამას ჰაერში კი არ ვამბობ, კონკრეტულ ინფორმაციებს ვეყრდნობი!“ - აცხადებს ირმა ინაშვილი.