„სამართლიანობა, კანონიერება, ჰუმანურობა,“- პოლიციელისთვის აუცილებელი სამი მთავარი პრინციპის შესახებ საქართველოს პრემიერ-მინისტრმა ქუთაისში პოლიციის დღისადმი მიძღვნილ ღონისძიებაზე ისაუბრა. ირაკლი ღარიბაშვილის თქმით, პოლიციის ძირეული რეფორმა და ამ სამი პრინციპის დამკვიდრება სწორედ მისი მინისტრონის დროიდან დაიწყო, 2012 წელს.

"ჩვენ ყველამ ერთად მივაღწიეთ იმას, რომ დღეს პოლიციელები დაკისრებულ მოვალეობას მაღალი პროფესიონალიზმით, დემოკრატიული სტანდარტების სრული დაცვით ასრულებენ. დღეს ამაყად შეგვიძლია ვთქვათ, რომ ქართული პოლიცია არის თითოეული მოქალაქის უსაფრთხოების გარანტი. ჩვენ მივაღწიეთ იმას, რომ დანაშაულის აღკვეთა და დანაშაულთან ბრძოლა ხორციელდება ჩვენი მოქალაქეების ღირსების შელახვის გარეშე. ეს არის ერთ-ერთი მთავარი პრინციპი დემოკრატიული სახელმწიფოს მშენებლობისთვის. ჩვენი მიზანია, მხოლოდ კანონიერი გზით ვებრძოლოთ დანაშაულს ისე, როგორც ეს ცივილიზებულ ქვეყანას, ღირსეულ პოლიციელებს ეკადრებათ. ჩვენ დღეს მესამედ აღვნიშნავთ პოლიციელის დღეს. ეს დღე სიმბოლურად ავარჩიეთ, ვინაიდან პირველი რესპუბლიკის პირველი შინაგან საქმეთა მინისტრი დაინიშნა სწორედ მაისის თვეში", - განაცხადა ირაკლი ღარიბაშვილმა.

მანვე საქართველოს პირველი დამოუკიდებელი რესპუბლიკის შს მინისტრი ნოე რამიშვილი გაიხსენა და აღნიშნა, რომ სწორედ მაისში დაინიშნა ის მინიტრად. ღარიბაშვილმა ხაზი გაუსვა რომ რამიშვილი ცნობილი იყო როგორც ,,რკინის მინისტრი".