დღეს სენაკისა და ზუგდიდის ოლქებში საკრებულოების შუალედური არჩევნები იმართება

პოლიტიკა - 12:02, 31 May, 2015

1432

31 მაისს საკრებულოების შუალედური არჩევნები სენაკისა და ზუგდიდის ოლქებში იმართება. (არჩევნები მაჟორიტარულისაარჩევნოსისტემით №64 სენაკის საარჩევნო ოლქის №64.13 ფოცხოსდა №67 ზუგდიდის ოლქის №67.11 ერგეტის ადგილობრივ მაჟორიტარულ საარჩევნო ოლქებში იმართება).

ორივე მაჟორიტარულ ოლქში რეგისტრირებულები არიან „ქართული ოცნების“, „ერთიანი ნაციონალური მოძრაობის“ და „თავისუფალი საქართველოს“ კანდიდატები, ხოლო სენაკში ასევე რეგისტრირებულია საინიციატივო ჯგუფის წარმომადგენელი.

როგორც ,,ნიუპოსტს“ ცესკო-დან აცნობეს, ორივე ოლქში ამომრჩეველთა საერთო რაოდენობა 2467-ია. სენაკის ერთ უბანზე (ფოცხო) ფიქსირდება 626 ამომრჩეველი, ხოლო მეორეზე (ქვემო ფოცხო) – 689. რაც შეეხება ზუგდიდს, აქ იხსნება ერთი უბანი, სადაც სულ - 1152 ამომრჩეველია.

დღეს, ცესკოში გამართულ შემაჯამებელ საინფორმაციო ბრიფინგზე ცესკოს სპიკერმა ანა მიქელაძემ ჟურნალისტებს არჩევნების შესახებ გააცნო დეტალური ინფორმაცია და განუცხადა, რომ საარჩევნო ადმინისტრაცია მზად არის საკრებულოს შუალედური არჩევნები წარმართოს მშვიდ, წყნარ და ყველასათვის ხელმისაწვდომ გარემოში, - „თითოეულ უბანს უკვე გადაეცა ყველა საჭირო ინვენტარი და დოკუმენტაცია, მათ შორის საარჩევნო ბიულეტენები, შემაჯამებელი ოქმები და სპეციალური კონვერტები. სამივე უბანი ხვალ ამომრჩევლისთვის დილის 8:00 სთ-დან გაიხსნება, ხოლო ხმის მიცემის პროცესი საღამოს 8 საათზე დასრულდება. რის შემდეგაც საარჩევნო ადმინისტრაცია ხმის დათვლის პროცედურებს დაიწყებს და როგორც კი ცესკო მიიღებს შემაჯამებელ ოქმებს, დაუყოვნებლივ გამოქვეყნდება კომისიის სპეციალურ ვებ-გვერდზე - results.cec.gov.ge.,“ - აღნიშნა ანა მიქელაძემ. მან ჟურნალისტებს ასევე მიაწოდა ინფორმაცია დამკვირვებლებისა და აგიტაციის წესების შესახებ:

31 მაისს, ხმის მიცემის მიმდინარეობას დააკვირდებიან როგორც შესაბამისი საარჩევნო სუბიექტების წარმომადგენლები, ისე შუალედური არჩევნებისთვის რეგისტრირებული 9 ადგილობრივი სადამკვირვებლო ორგანიზაციის 52 დამკვირვებელი და მედია ორგანიზაციები.

საარჩევნო კანონმდებლობის მიხედვით კენჭისყრის დღეს, კენჭისყრის შენობაში იკრძალება აგიტაცია. 31 მაისს აკრძალულია წინაასარჩევნო ფასიანი და უფასო რეკლამის განთავსება ტელევიზიისა და რადიოს ეთერში; ასევე, კანონით იკრძალება კენჭისყრის დღის 20 საათამდე არჩევნებთან დაკავშირებული საზოგადოებრივი აზრის გამოკითხვის შედეგების გამოქვეყნება.

საინფორმაციო ბრიფინგის ბოლოს, ანა მიქელაძემ სენაკისა და ზუგდიდის ამომრჩევლებს მოუწოდა, აქტიური მონაწილეობა მიიღონ შუალედურ არჩევნებში, „თითოეული თქვენგანის ხმა მნიშვნელოვანია,“ აღნიშნა ცესკოს სპიკერმა. მან ასევე მიმართა არჩევნებში ჩართულყველა მხარეს, ხელი შეუწყონ საარჩევნო პროცესის მშვიდ და თავისუფალ გარემოში წარმართვას.

შეგახსენებთ, რომ კენჭისყრის დღეს დილის 7:00 სთ-იდან ღამის 12:00 სთ-მდე იმუშავებს ცენტრალური საარჩევნო კომისიის კონტაქტ-ცენტრი, რომლის ტელეფონის ნომერიც არის - 2 51 00 51; ასევე იქნება ხელმისაწვდომი ონლაინ ჩატი და ონლაინ ოპერატორი. მოქალაქეებს და დაინტერესებულ მხარეებს შეუძლიათ მოგვმართონ და მოგვაწოდონ არჩევნებთან დაკავშირებული ნებისმიერი სახის ინფორმაცია.

ცენტრალური საარჩევნო კომისია 31 მაისს დღის განმავლობაში პერმანენტულად მიაწვდის მედიას და საზოგადოებას ინფორმაციას კენჭისყრის პროცესის მიმდინარეობის შესახებ.

საინფორმაციო ბრიფინგების განრიგი:

12:30 სთ

17:30 სთ

20:30 სთ

განრიგი საჭიროების შემთხვევაში შეიძლება შეიცვალოს.