უმრავლესობის ლიდერი დავით საგანელიძე მიხეილ სააკაშვილის ოდესის გუბერნატორად შესაძლო დანიშნის გამო უკრაინელებს თანაგრძნობას უცხადებს.

მისი თქმით, წლების შემდეგ ისინი მიხვდებიან თუ ვინ არის სინამდვილეში სააკაშვილი.

„ჩემთვის ძალიან ძვირფასს და ახლობელ უკრაინელ ხალხს, განსაკუთრებით ოდესის მოსახლეობას ვუთანაგრძნობ. ეს არის უკრაინის ხელისუფლების ძალიან დიდი შეცდომა. ღმერთმა ქნას, მიხეილ სააკაშვილი იდეოლოგიურად შეიცვალოს და სხვა ადამიანთან გვქონდეს საქმე, მაგრამ მისი სახელისა და გვარის პიროვნებისთვის, ეს წარმოუდგენლად მეჩვენება“, - განაცხადა საგანელიძემ.

მიხეილ სააკაშვილმა უკრაინის მოქალაქეობა მიიღო. ამის შესახებ უკრაინული მედია წყაროზე დაყრდნობით წერს.

სააკაშვილის მიერ უკრაინის მოქალაქეობის მიღების შესახებ სოციალურ ქსელებში უკრაინელი დეპუტატები, მუსტაფა ნაიემი და სერგეი ლეშენკოც წერენ.