მთავრობა არაფორმალურ მმართველობასთან და კოორდინაციის პრობლემასთან დაკავშირებით არასამთავრობო ორგანიზაციების შენიშვნას არ იზიარებს.

ამის შესახებ მთავრობის ადმინისტრაციის უფროსმა მაია ცქიტიშვილმა განაცხადა.

მისი თქმით, საჯარო სამსახურის რეფორმირების პროცესში მთავრობამ ბევრი გააკეთა.

„კოორდინაციის პრობლემასა და არაფორმალურ მმართველობასთან დაკავშირებულ შენიშვნას არ ვიზიარებ. მიმაჩნია, რომ დღეს ქვეყანას ინსტიტუტები მართავენ და არა კონკრეტული პიროვნებები, როგორც სამწუხაროდ ადრე გვქონდა. რაც შეეხება კოორდინაციის ნაკლებობას, მთავრობა კოორდინირებულია და უწყებები გამართულად მუშაობენ“, - განაცხადა ცქიტიშვილმა.

"საერთაშორისო გამჭვირვალობის" ხელმძღვანელის ეკა გიგაურის განცხადებით, ყველაზე მნიშვნელოვან გამოწვევად საქართველოში არაფორმალური მმართველობა რჩება.