„ნაციონალური მოძრაობის“ წევრი ჩიორა თაქთაქიშვილი ყოფილი თანაგუნდელების ქმედებას პარტიიდან წამოსვლის შესახებ სიმხდალეს და უპასუხისმგებლო საქციელს უწოდებს.

ამის შესახებ თაქთაქიშვილი სოციალურ ქსელში წერს და მიხეილ სააკაშვილის მიმართ ყოფილი „ნაციონალების“ დამოკიდებულებაზე მიანიშნებს.

„მარცხზე პასუხისმგებლობა იქნებ მის აღმასრულებელ მდივანს აეღო, თითქმის ერთი წელი ვერავითარი განახლება რომ ვერ შესთავაზა პარტიას და მის მხარდამჭერებს?

თუ ქვეყნიდან განდევნილი მიხეილ სააკაშვილის პასუხისმგებლობის დაყენებას მოითხოვენ?! თუ თვლიან, რომ მიშაა დამნაშავე და პარტიას საყვედურობენ, მიშას რატომ არ გაემიჯნა, რატომ ვერ ბედავენ ამის თქმას? ეშინიათ, რომ ენმ-ს ამომრჩევლების მხარდაჭერას დაკარგავენ, არა?

ჰოდა, ღალატით, სიმხდალითა და შიშითაა გაჟღენთილი 4-ეულის ეს უპასუხისმგებლო წამოწყება. და ამთავითვე მარცხისთვისაა ის განწირული.

"მარცხზე პასუხისმგებლობის აღება და პოლიტიკური მოძრაობის განახლება დამკვიდრებული პრაქტიკაა განვითარებული დემოკრატიის ქვეყნებში. მესამე გამოცდა ენმ-მ ვერ ჩააბარა", - ზ. ჯაფარიძესთან“, - წერს თაქთაქიშვილი.

შეგახსენებთ, „ნაციონალური მოძრაობა“ რამდენიმე დღის წინ დატოვეს ზურაბ ჯაფარიძემ, გოგა ხაჩიძემ, პავლე კუბლაშვილმა და გიორგი მელაძემ.