პრეზიდენტის ადმინისტრაცია სებ-დან საზედამხედველო ფუნქციის გამოყოფის საკითხს უარყოფითად აფასებს

პოლიტიკა - 19:53, 27 May, 2015

1144

საქართველოს პრეზიდენტის ადმინისტრაციის უფროსის მოადგილე, პრეზიდენტის მრჩეველი ეკონომიკურ საკითხებში გიორგი აბაშიშვილი ეროვნული ბანკიდან საზედამხედველო ფუნქციის გამოყოფის საკითხზე ეკონომიკურ ექსპერტებს შეხვდა.

გიორგი აბაშიშვილმა ეკონომიკის სფეროს ექსპერტებ ს პარლამენტის საფინანსო-საბიუჯეტო კომიტეტის მიერ მომზადებულ საკანონმდებლო ინიციატივასთან დაკავშირებით პრეზიდენტის ადმინისტრაციის პოზიცია გააცნო და აღნიშნულ თემასთან დაკავშირებით ექსპერტების მოსაზრებები მოისმენა.

"პრაქტიკულად არსებობს სრული კონსენსუსი იმასთან დაკავშირებით, რომ ეკონომიკა თავისუფალი უნდა იყოს პოლიტიკისგან; ვთანხმდებით, რომ არის ძალიან ნაჩქარევად მომზადებული აღნიშნული ინიციატივა, ბევრ ფაქტობრივ შეცდომას შეიცავს, თუნდაც განმარტებითი ბარათი, აბსოლუტურად ურთიერთსაპირისპირო მოსაზრებებია დაფიქსირებული და პრაქტიკულად შეუძლებელია პროფესიული კუთხით აღნიშნული ინიციატივა შეფასდეს თუნდაც როგორც დამაკმაყოფილებელი; პროფესიულად ეს არის ცუდად მომზადებული. მეორე სერიოზული საკითხია ის, რომ აბსოლუტურად, და ეს განმარტებით ბარათში, ანუ ოფიციალურ დოკუმენტშია აღნიშნული, რომ კანონპროექტის მომზადების პროცესში არ იყვნენ ჩაბმულები არც ექსპერტები, არც ბიზნესის წარმომადგენლები, არც საერთაშორისო ორგანიზაციები და თავისთავად ცხადია უმნიშვნელოვანესი პრინციპია, რომ მთლიანობაში კომუნიკაცია იყოს ბიზნესთან საფუძველშივე, ანუ მაშინ,როდესაც მზადდება კანონპროექტი, რომელიც მათ ეხება.

შეცდომაა საუბარი იმაზე, რომ მსგავსი ტიპის გადაწყვეტილება მხოლოდ საბანკო სექტორს დააზიანებს; ის დააზიანებს საბანკო სექტორს და შეეხება თითოეულ მოქალაქეს და მეორე, ამას ექნება ძალიან მკვეთრი გვერდითი და პარალელური ეფექტები ქვეყნის საინვესტიციო გარემოზე და ქვეყნის ბიზნეს იმიჯზე. მსგავსი ტიპის გადაწყვეტილება ამ ფორმით არის წარმოუდგენელი და პირდაპირ აზიანებს ქვეყანაში არსებულ ეკონომიკურ ვითარებას."-განაცხადა გიორგი აბაშიშვილმა