„მაიმუნების საზოგადოებაში უკეთესი დამოკიდებულებაა, ვიდრე პარლამენტში, შეხედე თუ გაქვს მათი ქცევა რამეს, ან პირად ურთიერთობებში, ან სახელმწიფოებრივ მოღვაწობაში, ან ჩხუბში, კამათში და ოპონირებაში. რა უნდა გაგიკვირდეს ადგილობრივი ორგანოების, ანუ, მაიმუნს რომ უთხრა შენ დეპუტატოო, ეწყინება” - აღნიშნული შეფასება "ლეიბორისტული” პარტიის ლიდერმა შალვა ნათელაშვილმა "გურიის მოამბის” გადაცემა "ექსკლუზივში", ადგილობრივ თვითმმართველობებში არსებულ მდგომარეობასა და სუსის მიერ მის მართულობაზე დასმულ კითხვაზე გააკეთა.

„ჩვენ გვაქვს ინფორმაცია, რომ სუსი, თუ რა ჯანდაბა ჰქვია, კუდი თუ კგბ, ერევა ამ საქმიანობაში. ეს არის კანონიერების უხეში დარღვევა, ამაზე სუსის თანამშრომლები აუცილებლად აგებენ პასუხს. იმდენ განათლებას და ინტელექტს კი უნდა ფლობდნენ, რომ ეს სწორად გაანალიზონ. ახლა მაგალითად, მცხეთაში ჩავატარეთ აქცია, წყლის გადასახადი გააძვირენ უსაშველოდ და წყლის კომპანიის წინ ვიყავით შეკრებილები და სუსი აწარმოებდა გამოკითხვებს დეპუტატებთან, მათ შორის ჩვენს დეპუტატებთანაც, რა საქმეზე ჩავდივართ, რა გვინდა, რას ვითხოვთ და ა.შ. ეტყობა მაგათ არ იციან წესდებაში რა უწერიათ, მაგათმა უნდა იბრძოლონ სახელმწიფო უშიშროების დასაცავად და არა პოლიტიკური ოპოზიციის საზდევნად, რომ მერე ზემოთ მოახსენოს ხელმძღვანელობას ყველაფერი. მეტი რა უნდა გითხრათ, თავისი ნათელმირონი დაუნიშნავს შუშის უფროსად, ვიღაც მჭედლიშვილი, თავისი უსაფრთხოების ყოფილი უფროსი, იქ პინგვინებს რომ იცავდა. შსს-ს მინისტრი, არის მისი პირადი დაცვის ყოფილი უფროსი. ანუ, პირადი სახელმწიფო შექმნა, ივანიშვილმა მოახდინა ქვეყნის პრივატიზაცია. ამისთვის, ის ცუდად აგებს პასუხს და მე მის ადგილზე ყოფნას არ ვისურვებდი“, -აღნიშნა ნათელაშვილმა.

პარტიის ლიდერი გადაცემაში NDI-ს მიერ ჩატარებულ კვლევის შედეგებსაც გამოეხმაურა და აღნიშნა, რომ 6%-ს ნაცვლად, მათი რეიტინგი 40%-ია.

აღნიშნა ისიც, რომ ერთადერთი პრობლემა, რის გამოც არჩევნებში ‘ლეიბორისტები“ ვერ იმარჯვებენ, „იუდას ვერცხლის არ ქონაა“.

"6 კი არა, სინამდვილეში კარგი 40% გვაქვს. მაგრამ NDI-ს ყოველთვის თავისი გათვლები აქვს. ერთადერთი პრობლემა გვაქვს, რის გამოც ვერ ვახერხებთ ხელისუფლებაში მოსვლას-მისი უდიდებულესობა იუდას ვერცხლი. ფული, არა გვაქვს.

სანამ ჩვენი ხალხი არ მიხვდება, რომ ფულიანი კაცის მიშვება პოლიტიკაში არის დანაშაული, მანამ არაფერი შეიცვლება, სანამ ჩვენი ბრძენი ხალხი არ მიხვდება იმას, რომ მილიონერი, რომელიც მიისწრაფვის პარლამენტში, იქ მიდის არა იმისათვის, რომ ამომრჩევლის ცხოვრება უზრუნველყოს, არამედ მიდის იმიტომ, რომ თავის მილიონებს კიდევ ერთი მილიონი დაამატოს, ძვირადღირებული ჯიპები იყიდოს, კარგი ჩაცმულ-დახურული იყოს, ოჯახი და შთამომავლობა უზრუნველყოფილი ჰყავდეს.

სანამ ამას არ გავიაზრებთ, რომ მილიარდერი პოლიტიკაში ხალხის ზურგზე კიდევ უფრო მეტად გამდიდრების სურვილით მოდის, მანამ ნორმალური, ჯანსაღი პოლიტიკური ცხოვრების დაწყება და სწორი არჩევანის გაკეთება არის შეუძლებელი“, - განაცხადა ნათელაშვილმა.

თეა იოსელიანი-გურია