„ნაციონალური მოძრაობის“ ყოფილი წევრი ზურაბ ჯაფარიძე ელისო კილაძის მიერ გადაცემა „არჩევანში“ გაკეთებულ განცხადებებს ეხმაურება.

„რომ შევაჯამოთ ელისო კილაძის უზუსტესი ინფორმაცია:

ვანო მერაბიშვილმა ციხიდან წამოიწყო ახალი თამაში. ვინმე ვაჟა ლილუაშვილის მეშვეობით ჩვენ გამოგვიყვანა ენმ-იდან. შემდეგ დაგვეხმარა კიევში 'ივერიასთან' საიდუმლო შეხვედრის ორგანიზებაში, რომლის მიზანიც იყო ჯაბა ებანოიძის უკრაინის იუსტიციის სამინისტროდან კარის გამოჯახუნებით წამოსვლა. შემდეგ ლატვიაში ჯოზეფ ქეის გაახსნევინა ჩვენთვის ანგარიში, სადაც ივანიშვილის მთავრობას ჩაარიცხინა მილიონები. და ეს ყველაფერი დაიგეგმა წყალტუბოში, სავარაუდოდ დეპუტატ ბუკიას კუთვნილი სასტუმროს (გავდა) ვერანდაზე გამართულ შეხვედრაზე, რომელშიც მონაწილეობდა პრემიერის ცოლის ძმა, ლექსო თამაზაშვილი. ეს გრანდიოზული გეგმა კი დასრულდება იმით, რომ ჩვენ შევქმნით ფრაქციას დეპუტატ ფეიქრიშვილთან და დეპუტატ შავლოხაშვილთან ერთად (დასაგუგლია ორივე)

ჰოდა, ამ ვითარებაში, ვოლსკის რა უხაროდა დღეს?“, - წერსჯაფარიძე სოციალურ ქსელში.

კილაძემ გადაცემა „არჩევანში“ განაცხადა, რომ უკრაინის იუსტიციის სამინისტროს სარეგისტრაციო დეპარტამენტის ხელმძღვანელის ჯაბა ებანოიძის თანამდებობიდან წასვლა ყოფილი „ნაციონალების“ უკრაინაში ვიზიტს უკავშირდება.

„რაც შეეხება გაგრძელებას, ეს გახლავთ ლატვიაში, იქ ასევე იმყოფებოდა კუბლაშვილი გიორგი მელაძესთან ერთად. ჩემი ინფორმაციით, იქ გახსნილია ანგარიში და ჯოზეფ ქეის მეშვეობით მისთვის თანხაა გადარიცხული. გამომდინარე იქიდან, რომ ქეი გარიგებულია ხელისუფლებასთან, ცხადია ეს არ იყო ჯოზეფ ქეის პირადი ინიციატივა, ეს იყო დავალება“, - განაცხადა კილაძემ.

ჟურნალისტმა არ გამორიცხა ასევე რომ პროცესების უკან ვანო მერაბიშვილი იდგეს.