საქართველოს დამოუკიდებლობის დღისადმი მიძღვნილ სამხედრო-საზეიმო ღონისძიებაზე თავდაცვის მინისტრი, თინათინ ხიდაშელი ავღანეთიდან ვიდეომიმართვით ჩაერთო. მან საქართველოს შეიარაღებულ ძალებსა და ქვეყნის მოსახლეობას დამოუკიდებლობის დღე მიულოცა. სიტყვით გამოსვლისას თინათინ ხიდაშელმა ყურადღება ქვეყნის დამოუკიდებლობის საქმეში სამხედრო მოსამსახურეების ღვაწლზე გაამახვილა. ხიდაშელმა აქართველოს თავისუფლებისა და მსოფლიოს უსაფრთხოების უზრუნველყოფისათვის დაღუპული სამხედრო მოსამსახურეები განსაკუთრებული პატივისცემით მოიხსენია .

„ზუსტად ერთი საუკუნის წინ - 1918 წლის 26 მაისს საქართველოს დამოუკიდებლობის აქტში ჩაიწერა შემდეგი სიტყვები, ამიერიდან, საქართველოს ხალხი სუვერენულ უფლებათა მატარებელია და საქართველო სრულუფლებიანი, დამოუკიდებელი სახელმწიფოა. ეს არ არის უბრალოდ სიტყვები, ეს არის იდეა, რომელიც გაცილებით უფრო დიდია, ვიდრე ერთ კონკრეტულ დოკუმენტში ჩაწერილი უბრალო ფრაზა. ეს არის სუვერენიტეტის, დამოუკიდებლობის და ჩვენი თავისუფლების იდეა, რომლის გამოც იბრძოდნენ თაობები, რასაც ეწირებოდნენ თაობები, რომლისთვისაც შრომობდნენ და იმარჯვებდნენ მრავალი საუკუნის განმავლობაში ქართველები. სწორედ სუვერენიტეტის და თავისუფლების სურვილი კრავს ერთ მუშტად ქართველ ხალხს, ქართულ სახელმწიფოს. საქართველოს დღევანდელი თაობა ღირსეული შვილია იმ წინაპრის, რომელიც საუკუნეების განმავლობაში იბრძოდა სახელმწიფოებრიობის შენარჩუნებისა და თავისუფლების განმტკიცებისთვის. საქართველოს დღევანდელი ხელისუფლება ყველაფერს აკეთებს იმისთვის, რომ მომავალი თაობის ღირსეული წინაპარი გახდეს“, - განაცხადა ხიდაშელმა.