საზოგადოებრივი მოძრაობა „ივერიას“ ერთერთი დამფუძნებელი მამუკა გამყრელიძე 4 წევრის მიერ „ნაციონალური მოძრაობის“ დატოვებას ეხმაურება და მათ სიმტკიცეს და პრინციპების ერთგულებას უსურვებს. ყოფილი ნაციონალების „ივერიაში“ გაერთიანების შესახებ გავრცელებულ ვერსიებს მამუკა გამყრელიძე არ ადასტურებს, თუმცა განსაკუთრებით მაღალ შეფასებას აძლევს ზურაბ ჯაფარიძეს, როგორც ენერგიულ და ფართო თვალსაწიერის მქონე პოლიტიკოსს:

„მინდა ჩემი პერსონალური სიმპათია გამოვხატო ზურაბ ჯაფარიძის მიმართ. ასეთი განათლებული, ენერგიული და ამგვარად ფართო თვალსაწიერის მქონე პოლიტიკოსი საქართველოში თითზე ჩამოსათვლელია. მიუხედავად მისი საბოლოო გადაწყვეტილებისა, რომელსაც ოთხშაბათს გავიგებთ მე, პირადად მინდა მას ჩემი მხარდაჭერა გამოვუცხადო. ვიცი, რომ ამ ოთხი ადამიანის მიმართულებით წამოვა ტალახისა და ჭუჭყის ნიაღვარი. მე მინდა მათ ვუსურვო სიმტკიცე და პრინციპების ერთგულება.
ისეთ ძლიერ და მყარად სტრუქტურირებულ ოპოზიციურ პარტიას როგორიც ენმ-ა ოთხი ადამიანის წასვლა არ დაანგრევს და პირიქით მოტივაციას შემატებს. ასე რომ მათ ზოგიერთ, განსაკუთრებულად "თავგადადებულ" მხარდამჭერს თავშეკავებული რეაგირებისაკენ მოვუწოდებ.
P.S. ნებისმიერ შემთხვევაში ამ მოვლენამ პოლიტიკური სივრცე გამოაცოცხლა და საინტერესო მოვლენები დააანონსა“- წერს მამუკა გამყრელიძე სოციალურ ქსელში.

შეგახსენებთ, რომ საზოგადოებრივი მოძრაობა "ივერიას" წევრები არიან ყოფილი ხელისუფლების წარმომადგენლები: მამუკა გამყრელიძე, გრიგოლ ვაშაძე, ნიკოლოზ ვაშაკიძე, ნინო კალანდაძე, მამუკა კუდავა, ნიკა რურუა და სხვები.

"ნაციონალური მოძრაობის" ოთხმა წევრმა: ზურაბ ჯაფარიძემ, გოგა ხაჩიძემ, პავლე კუბლაშვილმა და გიორგი მელაძემ პარტია გუშინ დატოვეს.