„ნაციონალური მოძრაობის“ წევრი გივი თარგამაძე სოციალურ ქსელში პარტიიდან თანაგუნდელების წასვლას ეხმაურება.

„ბრძოლა. მომქანცველი, გამთანგველი. როგორც გავარვარებულ უდაბნოში წყლის ძიებაში სიარული. თავიდან ის ჩვენი ცხოვრების ნაწილია. დროთა განმავლობაში, ჩვენი ცხოვრებაა, ყოველდღიურობა. ბრძოლა გარდაუვალია და აუცილებელი. მარცხი და გამარჯვება ერთმანეთს ცვლის, ბრძოლის სიმძიმე კი ორივე შემთხვევაში მხოლოდ იზრდება. დასვენებებს არ ვართ, მხოლოდ შეუჩერებლად მცირედ სულისმოთქმას. ასეთ რეჟიმს, სამწუხაროდ, ზოგჯერ, გამობრძმედილი მებრძოლებიც ვერ უძლებენ და მყუდრო ოაზისს აფარებენ თავს. ბრძოლაში მოუმზადებლად შემოსულიც ვერ ძლებს დიდხანს. ბრძოლის კანონი მისი დატოვების აუცილებელ წესს გულისხმობს - თანამებრძოლებისთვის მიზეზის განმარტებას და გასვლის შეთანხმებას. გაუფრთხილებლად მიტოვება მიუღებელია. ჩვენ ამ ქვეყნის კეთილდღეობისთვის მებრძოლთა ყველაზე გამოცდილი გუნდი და დღევანდელი ანტისახელმწიფოწბრივი ხელისუფლების ერთადერთი ალტერნატივა ვართ, რომელიც ლეგიტიმური გზით შეცვლის რეალობას, ოლიგარქს ჩამოაშორებს ქვეყნის მართვას. ბრძოლა გრძელდება და გამარჯვება გარდაუვალია“, - წერს თარგამაძე.