დღეს, ეროვნული ბანკის პრეზიდენტს და ფინანსთა მინისტრს პარლამენტში ელოდებიან. მათ საფინანსო საბიუჯეტო კომიტეტის სხდომაზე მოუსმენენ. დეპუტატების წინაშე, ნოდარ ხადური სამი თვის მიმოხილვით, გიორგი ქადაგიძე კი წლიური ანგარიშით წარსდგება.

საპარლამენტო უმცირესობის წევრი გიორგი ვაშაძე აცხადებს, რომ კომიტეტებში ამგვარი მოსმენების გამართვით, ხელისუფლება ცდილობს პრობლემები სხვას გაადაბრალოს. ვაშაძის თქმით, საინტერესოა თუ როგორ ხედავს ფინანსთა სამინისტრო შექმნილი მდგომარეობიდან გამოსავალს.

„ჩვენი კითხვებიც ამაზე იქნება აქცენტირებული, სად ხედავს გამოსავალს ამ შემთხვევაში ფინანსთა სამინისტრო, რომელიც არის მთავარი პასუხისმგებელი იმაზე, რაც ხდება ქვეყანაში. საინტერესოა აგრეთვე ეროვნული ბანკის პოზიციაც ამ საკითხებთან დაკავშირებით.

რაც შეეხება კომისიებს, ეს უფრო არის მცდელობა გადაბრალების მექანიზს მოძიების, რომ რამე სხვას დააბრალონ. საქართველოში ყველამ ძალიან კარგად იცის ვისი მიზეზით არის ეს ეკონომიკური კრიზისი, რატომ ხდება ლარის დევალვაცია და სწორედ ხელისუფლებისგან მოითხოვს მოსახლეობა კრიზისის დასაძლევად კონკრეტულ გეგმას,“- განაცხადა გიორგი ვაშაძემ.