,,ნაციონალური მოძრაობის“ ახალგაზრული ფრთა ზუგდიდში შერჩევით სამართალზე საუბრობს

პოლიტიკა - 16:37, 22 May, 2015

1319

ამ წუთებში ზუგდიდში, სახელმწიფო უსაფრთხოების სამხარეო შენობის წინ ბრიფინგს "ნაციონალური მოძრაობის" ახალგაზრული ფრთის ხელმძღვანელი ლევან თორია მართავს. მისი განცხადებით, რამდენიმე დღის წინ, ახალსოფლის გზაზე ავტოსაგზაო შემთხვევა მოახდინა "სუსის" ერთერთი სამსახურის უფროსმა ბაკურ გულუამ, რომელიც სუსის სამხარეო უფროსისთვის სახელმწიფოს მიერ გამოყოფილ ავტომობილს მართავდა. თორიას თქმით, ავტომობილის ღირებულება 70 ათას აშშ-დოლარს შეადგენს.

ლევან თორიას აცხადებს, რომ სუსის თანამშრომელი ავტომობილს ნასვამ მდგომარეობაში მართავდა, რა დროსაც ავტოსაგზაო შემთხვევა მოხდა. თორიას თქმით, რომ მომხდართან დაკავშირებით არ დაწყებულა გამოძიება. საპატრულო პოლიციის თანამშრომლებმა კი არ შეადგინეს ნახაზი და მომხდარი ფაქტი არ დააფიქსირეს. „ნაციონალური მოძრაობის“ ახალგაზრდული ფრთის ლიდერი აცხადებს, რომ ადგილი აქვს შემთხვევას, როდესაც დანაშაულზე რეაგირება სამართალდამცავების მხრიდან შერჩევით ხდება.

ლევან თორია ასევე აცხადებს, რომ ბაკურ გულუა არის ადამიანი, რომელმაც ცრუ ჩვენება მისცა პროკურატურას თენგიზ გუნავას საქმესთან დაკავშირებით. მისივე თქმით, ბაკურ გულუას თენგიზ გუნავას საქმეზე პროკურატურასთან შეთანხმება ჰქონდა დადებული და ამ დამსახურების გამო, დღეს საქართველოს ხელისუფლება მის სხვადასხვა სახის გადაცდომებზე თვალს ხუჭავს.