”რუსეთის გასაღიზიანებლად საქართველოს არსებობაც კი საკმარისია”- ხიდაშელის ინტერვიუ ”le jdd”-სთან

პოლიტიკა - 01:56, 22 May, 2015

1745

ფრანგული მედია ”Le Journal du Dimanche” საქართველოს თავდაცვის მინისტრ თინათინ ხიდაშელთან ინტერვიუს აქვეყნებს. როორც გამოცემა წერს, ქართველი მინისტრი მათ აღმოსავლეთ პარტნიორობის სამიტის მოლოდინებზე და რუსეთთან არსებულ დაძაბულ კლიმატზე ესაუბრა:

რუსეთის საგარეო მინისტრმა განაცხადა, რომ ევროკავშირის აღმოსავლეთ პარტნიორობის სამიტი არის ანტირუსული სამიტი. თქვენ რას უპასუხებდით მას?

მე მინდა მას შევახსენო, რომ საქართველო არსებობს, ეს კი რუსეთის გასაღიზიანებლად უკვე საკმარისია. მაგრამ მე განსაკუთრებით მინდა მას ესმოდეს, რომ ევროკავშირი არავის წინააღმდეგ არ არის. ამ სამიტის დღის წესრიგი არის დისკუსიები იმისთვის, რომ მოხდეს უფრო მეტი განვითარება, მეტი კეთილდღეობა, გადაადგილების მეტი თავისუფლება. დროა საქართველოს მსგავსმა სუვერენულმა ქვეყნებმა თავად გადაწყვიტონ, ვისთან სურთ თანამშრომლობა და ცხოვრება , და ცხოვრების წესიც თავად აირჩიონ. რუსეთმა არჩევანი გააკეთა და ამ არჩევანს ჩვენ ვხედავთ უკრაინაში. ჩვენი არჩევანი კი რიგის სამიტზე მონაწილეობაა.

რას ელით ამ სამიტისგან?

მე არ ვიცი, მივიღებთ თუ არა ვიზის ლიბერალიზაციას, მაგრამ რიგის სამიტის დეკლარაციამ უნდა შემოგვთავაზოს დღის წესრიგი, რომელშიც დეტალურად იქნება განხილული ის ეტაპები, რომლის გავლის შემდეგ ჩვენი მიზანი რეალობად იქცევა.

მე საკმაოდ ოპტიმისტი ვარ. ვფიქრობ, ვილნიუსის სამიტის შემდეგ საქართველოს მიერ 2 წელში მიღწეულ პროგრესი კარგი თვალით იქნება დანახული.

სამიტამდე ერთი კვირით ადრე საქართველომ 300 ამერიკელ ჯარისკაცს უმასპინძლა, რომლებმაც თქვენი ჯარი უნდა გაწვრთნან. ეს ვლადიმერ პუტინისთვის გაგზავნილი მესიჯია?

აშშ არის ჩვენი ყველაზე დიდი სტრატეგიული პარტნიორი, უკვე ათული წლებია. ჩვენი თანამშრომლობა ნატოსთან კრიტიკული მნიშვნელობისაა. თუ ჩვენი ჯარი გახდება უფრო ძლიერი, ეს იქნება იმის მანიშნებელი, რომ ქვეყანაც გაძლიერდა. მაგრამ არავინ არ არის გულუბრყვილო და არ სჯერა იმის, რომ ხვალ ნატოს წევრად გაიღვიძებს. საქართველო რეალისტად რჩება. ნატოს წევრი ქვეყნები არ დასხმიან რუსეთს თავს. ესტონეთი და პოლონეთი არიან ნატოს წევრები, მაგრამ ისინი რუსეთის წინააღმდეგ რამის გაკეთბას არ ცდილობენ. ეს რუსული პროპაგანდაა, რომელიც აცხადებს, რომ მის მეზობელ ქვეყნებს ნატოში შესვლა იმისთვის უნდათ, რომ შემდეგ რუსეთს ომი გამოუცხადონ. უნდა გავიხედოთ ფანჯარაში, ჩვენ XXI საუკუნეში ვართ. აგრესიის განხორციელებით ოკუპაციის დრო დასრულდა.

რუსულმა ვერტმფრენებმა არაერთხელ დაარღვიეს თქვენი საჰაერო სივრცე. ამას როგორი რეაგირება მოჰყვა?

დიახ, ზეწოლა ძლიერია. რუსეთი არღვევს ჩვენ საჰაერო სივრცეს, იტაცებს ჩვენს მოქალაქეებს და ხელს უწყობს მრავალ სხვა უკანონო ქმედებას საზღვარზე. არსებობს ცდუნება , რომ ამ პროვოკაციებს პასუხი გაეცეს, მაგრამ ეს იქნებოდა მოსკოვის თამაშზე აყოლა. ისინი უცდიან ჩვენი მხრიდან დაშვებულ შეცდომას. ჩვენი მთავრობისთვის ყველაზე მნიშვნელოვანია, თავიდან იქნეს აცილებული ახალი ომი საქართველოში. ჩვენ აღარ გვსურს მეტი მსხვერპლი.

_{ნინო ზედგენიძე}