"ისტორია ხვალ არ მთავრდება, შემდეგი თვეები იქნება გადამწყვეტი"- ბოკერია რიგის სამიტის შესახებ

პოლიტიკა - 15:52, 21 May, 2015

1743

„ნაციონალური მოძრაობის“ საგარეო ურთიერთობების მდივანმა გიგა ბოკერიამ, ევროპის სახალხო პარტიის თავმჯდომარესთან შეხვედრის შემდეგ, იმ დეკლარაციის შესახებ ისაუბრა, რომლის მიღებასაც ევროპის სახალხო პარტია რიგის სამიტთან დაკავშირებით აპირებს.
ბოკერიას თქმით ევროპასთან ურთიერთობის გაღრმავებაში მთავარი ნაბიჯები მთავრობამ უნდა გადადგას, რადგან ოპოზიცია მის ფუნქციებს ვერ შეითავსებს:

„შეუძლებელია მთავრობის ფუნქცია ოპოზიციამ შეითავსოს, მთავრობამ უნდა იმუშაოს იქ სადაც სამთავრობო სტრუქტურებია. მაგრამ ჩვენ როგორც პასუხისმგებლობის მქონე, დემოკრატიული და პროევროპული ოპოზიცია, ყველაფერს გავაკეთებთ, რომ ამ პოლიტიკურ ოჯახში იყოს მაქსიმალური მხარდაჭერა და ამ დეკლარაციაში ეს იქნება გამოვლენილი.“- განაცხადა ბოკერიამ.

ბოკერიას თქმით, იმისდა მიუხედავად, რომ რიგის სამიტის ნეგატიური პროგნოზი ცნობილია, ევროპული პერსპექტივის მოსაპოვებლად მუშაობა უნდა გაგრძელდეს:

„ისტორია ხვალ არ მთავრდება, ვიცით ხვალინდელი ნეგატიური პროგნოზი, მაგარამ შემდეგი თვეები იქნება გადამწყვეტი, ყველაფერს გავაკეთებთ, რომ ხელი შევუწყოთ ქვეყნისთვის ამ პერსპექტივის მოპოვებას, მაგრამ მთავრობამ პოლიტიკური დევნით და კრიმინალის ზრდით ხელის შეშლა უნდა შეწყვიტოს," - აღნიშნა ბოკერიამ.