ევროკავშირი საქართველოს, მოლდოვასა და უკრაინას მცირე და საშუალო ბიზნესის განვითარებისთის 2 მილიარდ ევროს გამოუყოფს. ამის შესახებ ევროკომისიის ოფიციალური გვერდი იტყობინება.

ასოცირების შესახებ ხელმომწერი ქვეყნებისთვის მომდევნო 10 წლის განმავლობაში ევროკავშირის ბიუჯეტიდან დახმარების სახით 200 მილიონი ევროს გრანტი გამოიყოფა. ეს დახმარება საქართველოს, მოლდოვასა და უკრაინას მცირე და საშუალო ბიზნესის განვითარებისთვის 2 მილიარდიან ინვესტირებასაც გულისხმობს. აღნიშნული თანხა ევროპის რეკონსტრუქციისა და განვითარების ბანკიდან და ევროპის საინვესტიციო ბანკიდან გამოიყოფა.

„ევროკავშირსა და აღმოსავლეთ პარტნიორებს შორის სავაჭრო კავშირების განსავითარებლად, ევროკომისიამ კონკრეტული ნაბიჯების განხორციელების პირობა დადო. ასოცირების, ღრმა და ყოვლისმომცველი თავისუფალი სავაჭრო სივრცის შესახებ შეთანხმება კი არის ინსტრუმენტი, რათა საქართველოს, მოლდოვისა და უკრაინის ეკონომიკა ევროკავშირთან და ჩვენს შიდა ბაზართან დაახლოვდეს. ინვესტიცია, რომელიც 2 მილიარდი დოლარის გამოყოფას ითვალისწინებს, ამ ქვეყნების ეკონომიკას უფრო მეტად კონკურენტუნარიანს გახდის, ადგილობრივ კომპანიებში ინვესტირებას შეუწყობს ხელს, რაც შესაბამისად უფრო მეტ სამუშაო ადგილებს წარმოშობს. ჩვენ დაინტერესებულნი ვართ აღმოსავლეთ პარტნიორობის ქვეყნებთა ურთიერთობის გაღრმავებით“ - განაცხადა ევროკომისიის პრეზიდენტმა, ჟან-კლოდ იუნკერმა.

ევროკავშირის გაფართოებისა და სამეზობლო პოლიტიკის საკითხებში ევროკომისრის, იოჰანეს ჰანის თქმით კი, მცირე ბიზნესი სამუშაო ადგილების შექმნისთვის მთავარი მამოძრავებელი ძალა და თანამედროვე ეკონომიკისთის სასიცოცხლოდ მნიშვნელოვანია. მისივე თქმით, ამ საკითხზე ოფიციალურ განცხადებას რიგის სამიტზე გააკეთებს.

ხატია ლაღიძე