რუსეთის სათათბიროში სამხრეთ ოსეთთან გაფორმებული ე.წ ხელშეკრულების რატიფიკაციის განხილვაზე პრეზიდეტის ოფიციალურ წარმომადგენლად გრიგორი კარასინის დანიშვნას რუსეთის საგარეო საქმეთა მინისტრი სერგეი ლავროვი გამოეხმაურა. რუსეთის საგარეო უწყების ხელმძღვანელი ამ ფაქტში პრობლემას ვერ ხედავს და აცხადებს, რომ გრიგორი კარასინმა იგივე ფუნქცია აფხაზეთთან გაფორმებული ხელშეკრულების რატიფიკაციის განხილვის დროსაც შეასრულა.

"კარასინი იყო პრეზიდეტ პუტინის პირადი წარმომადგენელი, მაშინ როდესაც, ფედერალურ სათათბიროში განიხილებოდა აფხაზეთსა და რუსეთს შორის ხელშეკრულებების რატიფიკაცია და მაშინ არაფერი მომხდარა, მას შემდეგ აბაშიძე-კარასინის ფორმატში, არაერთი შეხვედრა გაიმართა. რაც შეეხება ფორმატის გაფართოებას, თუ ჩვენი ქართველი პარტნიორები შემოგვთავაზებენ ამ ფორმატში ჩავრთოთ აფხაზეთი, სამხრეთ ოსეთი ან კავკასიის რეგიონის სხვა ქვეყნები მზად ვართ განვიხილოთ ეს საკითიხი",- განაცხადა რუსეთის საგარეო საქმეთა მინისტრმა სერგეი ლავროვმა, „მაესტროს“ მოსკოვის ბიუროსთან საუბარში.