თბილისის საკრებულოს უმრავლესობის წევრი დავით ზურაბიშვილი პრემიებთან დაკავშირებული განცხადებების გამო სოფლის მეურნეობის მინისტრს აკრიტიკებს.

მისი განცხადებით, იმის თქმა, რომ მინისტრების მუშაობა შესაბამისად უნდა დაფასდეს, საბჭოურ-ჩინოვნიკურ დამოკიდებულებაზე მიუთითებს.

„ტიპიური საბჭოურ–ჩინოვნიკური და არაპოლიტიკური დამოკიდებულებაა, თან საკმაოდ დამახასიათებელი საქართველოსთვის. ვერაფრით ვერ ხვდებიან, რომ ხალხს (ამომრჩეველს) ასი წელი არ აინტერესებს სახლში როდის მიდის მინისტრი, რამდენ ადამიანს ელაპარაკება დღე–ღამეში და ოცდაოთხი საათი მუშაობს თუ ორი საათი.

თანამდებობის პირი უნდა შეეგუოს და ბუნებრივად მიიღოს ის, რომ მისი უწყების მიმართ დამოკიდებულება იქნება კრიტიკული, რადგან გადაუჭრელი პრობლემები ყოველთვის გაცილებით მეტია, ვიდრე გადაჭრილი. კრიტიკა არ ისმის მარტო ავტორიტარული რეჟიმის და დიქტატურის დროს. დემოკრატია თუ გინდა, კეთილი ინებე და აიტანე, რომ სულ კრიტიკული მზერის ქვეშ იქნები.

მეორეს მხრივ ეს პერმანენტულად კრიტიკული დამოკიდებულება სულაც არ ნიშნავს, რომ ხალხი (ამომრჩეველი) მაინცა და მაინც შენს ოპონენტებს დაუჭერს მხარს და არა შენ. ხალხი (ამომრჩეველი) შეაფასებს შენს მიერ გაკეთებულ საქმეებს, შენს მიმართ კრიტიკის მართებულობას და ამის მიხედვით განსჯის

ამიტომ ყველაზე არასწორი, რასაც თანამდებობის პირი შეიძლება მოითხოვდეს ხალხისგან (ამომრჩევლისგან), ეს არის ქება, მხარდაჭერის გამოხატვა და "დაფასება". თანამდებობის პირი უნდა მუშაობდეს და მუდმივად აბარებდეს ანგარიშს ამომრჩეველს, აწვდიდეს მას ინფორმაციას გაკეთებულ საქმეებზე ყოველგვარი შეფასებების და "აი, მე რა კარგი ვარ" დისკურსის გარეშე. ამ შეფასებას ხალხი (ამომრჩეველი) როგორმე შენი პირდაპირი კარნახის გარეშე გააკეთებს. მოწონების და დაფასების მოთხოვნა კი ხალხს (ამომრჩეველს) ყოველთვის აღიზიანებს და ნეგატიურად განაწყობს.

ეჰ. მე კი ვიცი ეს, მაგრამ რად გინდა?... ეს კაცი არაა პოლიტიკოსი და სანამ მინისტრად დანიშნავდნენ, დიდის ალბათობით არც კი ფიქრობდა, რომ პოლიტიკური თანამდებობის დაკავება მოუწევდა. ასეთი, თუ შეიძლება ასე ითქვას, ტექნოკრატების დანიშვნა პოლიტიკურ თანამდებობაზე, თუ ავტორიტარული რეჟიმი და დიქტატურაა არაა, არასდროს არ გაამართლებს“, - წერს ზურაბიშვილი ერთ-ერთი ფეისბუქმეგობრის პოსტის კომენტირებისას.