ივანიშვილმა რუსებისგან მიიღო კონკრეტული მითითება

ივანიშვილმა რუსებისგან მიიღო კონკრეტული მითითება - ალასანია

პოლიტიკა - 12:40, 19 May, 2015

7480

„თავისუფალი დემოკრატების“ ლიდერის ირაკლი ალასანიას განცხადებით ბიძინა ივანიშვილი არ ელოდა, რომ ნატოსთან მიმართებაში თავდაცვის სამინისტრო ხელშესახებ შედეგს მიაღწევდა. ამასთანავე ამ პროცესის ხელისშესაშლელად ივანიშვილმა გარკვეული მითითებები რუსეთისგანაც მიიღო. აღნიშულ თემაზე თავდაცვის უწყების ყოფილმა ხელმძღვანელმა გაზეთ „ქრონიკა+“-სთან ინტერვიუში ისაუბრა:

„ივანიშვილი არ ელოდა, რომ ჩვენ მივაღწევდით ასეთ ხელშესახებ შედეგს ნატოსთან მიმართებით. ასევე დარწმუნებული ვარ და შინაგანად ვიცი, რომ რუსებისგან მიიღო კონკრეტული, ღია და ფარული მითითებაც, რომ ეს ნაბიჯები მას ხელს შეუშლიდა რუსეთთან ურთიერთობაში, რაც, ბუნებრივია, არასწორი მიდგომაა სახელმწიფოს მმართველის მხრიდან. არ შეიძლება, რუსებს ანგარიში გაუწიო შენს შიდა უსაფრთხოებასა და საკადრო გადაწყვეტილებებზე. მის მოქმედებას- რუსებთან ურთიერთობას მისი წარსულიდან გამომდინარე შევაფასებ და ამ ნაბიჯს შეცდომად ჩავუთვლი.“- აცხადებს ალასანია, მისი თქმით ივანიშვილისთვის დამოუკიდებელი აზროვნების მქონე ფიგურები მიუღებელია.

„მას სურს, რომ ყველა და ყველაფერი იყოს მორჩილებაში. ამ შემთხვევაში, ამ მორჩილებიდან ამომხტარი ნებისმიერი პოლიტიკური ძალა არის მიუღებელი და ეს ბუნებრივია, მაშინაც იგრძნობოდა. ივანიშვილს მართვის სტილი ჰქონდა საბჭოური, ოლიგარქიული, პრინციპში, 90-იან წლებში მას სხვა არც უკეთებია არაფერი. რა თქმა უნდა, მივიღე, რომ ეს ადამიანი იყო ასეთი, ინსტრუმენტული და ძალიან მნიშვნელოვანი იმ ცვლილებებისთვის, რომელიც გარდაუვალი იყო, რასაც ერქვა სააკაშვილის ხელისუფლებიდან მოცილება. ივანიშვილი იყო ავტორიტარი, მონურ მორჩილებაში უნდოდა ჰყოლოდა ყველა. მე აბსოლუტურად განსხვავებული ტიპი ვარ, აქედან გამომდინარე, ეს კონფლიქტი ჩანასახშივე იყო. თავდაცვა იმდენად მეძვირფასებოდა, რომ პირად წყენებზე ვხუჭავდი თვალს. ასეც გავაგრძლე, ვიდრე ეს არ გადაიზარდა იმხელა სიმახინჯეში, რომ ჩემს გამო ხუთი უდანაშაულო ადამიანი დაიჭირა და ციხეში ჩასვა.“- განაცხადა თავდაცვის ყოფილმა მინიტრმა.