"დავინახოთ, რეალური მტერი ვინაა, პუტინი რომ აღარ იქნება, უკეთესი სიტუაცია იქნება?!“- პაატა ზაქარეიშვილი

პოლიტიკა - 23:10, 15 May, 2015

2041

შერიგებისა და სამოქალაქო თანასწორობის საკითხებში სახელმწიფო მინისტრის პაატა ზაქარეიშვილის განცხადებით მოსაზრება იმის შესახებ , რომ საქართველოს პრობლემა და მტერი მხოლოდ პუტინია საქართველოს აკნინებს:

„კეთილი ვინებოთ და ნუ ვაკნინებთ სახელმწიფო საქართველოს, ერთი ადამიანი ვერ იქნება სახელმწიფოს მტერი, მტერი შეიძლება იყოს რუსეთი. პუტინს აქვს 75%-იანი ნდობა რუსეთში და კეთილი ვინებოთ და ამას თვალი გავუსწოროთ . ერთი ადამიანი არ შეიძლება იყოს ის ვინც ჩვენ გვინდა. ამიტომ ეს არის ჩვენი რაღაც პრიმიტიულობისა და პროვინციალიზმის დამოკიდებულება, რომ ერთ ადამიანზე გადაგვაქვს და ვამბობთ ორი რუსეთი, სამი რუსეთი. მედვედევი იყო პრეზიდენტი და კაციშვილი ხმას არ იღებს მედვედევზე. კეთილი ვინებოთ გავახილოთ თვალები და დავინახოთ რეალური მტერი ვინაა... პუტინი, რომ აღარ იქნება უკეთესი სიტუაცია იქნება?!“- განაცხადა პაატა ზაქარეიშვილმა.

„რუსული ოკუპაცია და რუსული ანექსია მკაფიოდ გამოკვეთილია. ამიტომ, პიროვნებებში კი ნუ ვეძებთ პრობლემებს, დავინახოთ რეალური, ნამდვილი საფრთხე და ამ საფრთხეს ვებრძოლოთ“, - აღნიშნა სახელმწიფო მინისტრმა.

რაც შეეხება საზოგადოებრივი აზრის კვლევის შედეგებს, რომელიც ეროვნულ-დემოკრატიულმა ინსტიტუტმა (NDI) რამდენიმე დღის წინ გამოაქვეყნა, ზაქარეიშვილის მტკიცებით, სოციოლოციური კვლევა არ შეიძლება აბსოლუტურად მისაღები ან მიუღებელი იყოს.

მისივე თქმით, კვლევაში მონაწილე ევრაზიულ კავშირში გაწევრიანების მომხრეთა 31%-იანი მაჩვენებელი შეიძლება სერიოზული შეტყობინება იყოს.

„არასდროს ვენდობი სოციოლოგიურ კვლევებს, მაგრამ ყოველთვის მაინტერესებს. სოციოლოგიური კვლევა საზოგადოების სარკე არ არის. სოციოლოგიური კვლევა თვითონ საზოგადოების ნაწილია და არა საზოგადოების ფოტოსურათი. ამიტომ, ანალიზი სჭირდება მას და არა ემოციური დამოკიდებულება“, - განაცხადა პაატა ზაქარეიშვილმა.