რუსულმა პროპაგანდამ წალეკა საქართველო და ჩვენ კაპიტულაცია გვაქვს გამოცხადებული

რუსულმა პროპაგანდამ წალეკა საქართველო და ჩვენ კაპიტულაცია გვაქვს გამოცხადებული - ლაგაზიძე

პოლიტიკა - 22:46, 15 May, 2015

1784

ექსპერტ ხათუნა ლაგაზიძის განცხადებით, დასავლეთს საქართველოსთან მიმართებაში უფრო მეტი ძალისხმევა უნდა გამოეჩინა და ქვეყანას ეკონომიკის განვითარებაში უფრო მეტად დახმარებოდა, რომ საქართველოს მოსახლეობა სოციალური პრობლემების გამო რუსეთსა და დასავლეთს შორის არჩევანის წინაშე არ დამდგარიყო. ამის შესახებ ხათუნა ლაგაზიძემ გადაცემა „რეაქციაში“ ისაუბრა.

„დასავლეთმა ვერ თუ არ გააკეთა, ის რომ ამ ქვეყნის სოციალური და ეკონომიკური მდგომარეობის გაუმჯობესებაზე ეზრუნა. სწორედ დასავლეთის დახმარებით სამხრეთ კორეამ შეძლო ეკონომიკური სასწაულის ქვეყნად და ჩრდილოეთ კორეის საპირწონედ ქცეულიყო. იმი საუბარი რომ გვერდით რუსეთია და მუდმივი საფრთხის ქვეშ ვიყავით არაფერს არ ამართლებს, სხვანაირი მიდგომები იყო საჭირო. საქართველო უნდა ქცეულიყო ეკონომიკური სასწაულის ქვეყნად. რეგიონშ და დღეს აღარ დადგებოდა ის საკითხი, რაც თქვეს, რომ ზოგიერთი ვაშლზე ყიდის ქვეყანას. ადამიანები სოციალური და ეკონომიკური პრობლემების გამო იძულებულნი არიან ასეთი მძიმე არჩევანის წინაშე დადგნენ.“- განაცხადა ექსპერტმა და აღნიშნა, რომ რუსეთი საქართველოს მიმართ ჰიბრიდულ ომს ორი მიმართულებით აწარმოებს, ეს არის საინფორმაციო და ეკონომიკური პოლიტიკა. ხათუნა ლაგაზიძის თქმით ამის საწინააღმდეგოდ საქართველოს ხელისუფლებას არანაირი პოლიტიკა და ალტერნატივა არ გააჩნია.

„ქვეყნის წინააღმდეგ ჰიბრიდული ომი რეალურად მიდის, ეს არის საინფორმაციო პოლიტიკა და პროპაგანდა, რომელმაც წალეკა საქართველოს საინფორმაციო სივრცე და ჩვენ სამწუხაროდ კაპიტულაცია გვაქვს გამოცხადებული ამ საინფორმაციო პოლიტიკის წინაშე. მე ვერ ვხედავ ორგანიზებულ საინფორმაციო პოლიტიკას, რომელიც შეძლებდა ამ ნაკადის დაბალანსებას, რუსეთს თავისი მიზნები რომ აქვს გასაგებია, მაგრამ შენ რომ სახელმწიფო ხარ, შენც ხომ უნდა გქონდეს ალტერნატივა. მეორე მხარე ამ ომის არის ეკონომიკური პოლიტიკა, რუსეთი ცდილობს გაცილებით ხანგრძლივვადიანად და მძლავრად დაამყაროს საქართველოზე გავლენა, ვიდრე ამას მოახერხებდა ტანკებით.“- განაცხადა ხათუნა ლაგაზიძემ.