,,კალაძის განცხადება საბანკო სექტორისთვის დამაზიანებელია“

,,კალაძის განცხადება საბანკო სექტორისთვის დამაზიანებელია“ - ზურაბ მელიქიშვილი

პოლიტიკა - 18:31, 15 May, 2015

1092

ვიცე-პრემიერის კახი კალაძის განცხადებას იმის შესახებ, რომ ეროვნული ბანკი ნაკლებად აკონტროლებს კომერციული ბანკების ქმედებას, გამხმაურება მოჰყვა საპარლამენტო უმცირესობის მხრიდან. ნაციონალური მოძრაობა კალაძის განცხადებას საბანკო სექტორისთვის დამაზიანებელს უწოდებს.

,,ეს არის მცდელობა, რომ დღევანდელი მთავრობის უნიათობის გამო შექმნილი პრობლემები, მოხდეს გადაბრალება სხვა ინსტიტუციებზე. რაც შეეხება ფინანსური მონიტორინგის სამსახურს, შევახსენებ დღევანდელ მთავრობას, რომ 2014 წლიდან ის გამოსულია ეროვნული ბანკის შემადგენლობიდან და ანგარიშვალდებულია მთავრობასთან“ - განაცხადა ზურაბ მელიქიშვილმა.

კახი კალაძის განცხადებით, მთავრობას დიდი ბანკების მიერ განხორციელებულ ტრანზაქციებზე ინფორმაცია არ აქვთ და ბოლო დროს განვითარებული მოვლენები შესაძლოა, ხელოვნური და პოლიტიკურიც კი იყოს.

„არანაირი ინფორმაცია არ გვაქვს და არ ვიცით, ბოლო თვეების, კვირების განმავლობაში, თუნდაც საქართველოს ბანკის მიერ, „თიბისი“ ბანკის მიერ, რა ტრანზაქციები იქნა განხორციელებული. ამასაც ძალიან დიდი მნიშვნელობა აქვს და ამ ყველაფრის ბერკეტი ნამდვილად აქვს ეროვნული ბანკის პრეზიდენტს და მე შემიძლია გითხრათ, რომ მას ნამდვილად შეუძლია, ჩაერიოს ამ კონკრეტულ პროცესში და დაეხმაროს მთავრობას, ხელისუფლებას“, - განაცხადა კალაძემ.