თინა ხიდაშელმა მოადგილეები წარადგინა

პოლიტიკა - 15:07, 15 May, 2015

7010

თავდაცვის მინისტრმა ახალი მოადგილეები წარადგინა.

თინა ხიდაშელი პირველი მოადგილედ ფინანსთა მინისტრის ყოფილი მოადგილე დავით ებრალიძე დაინიშნა.

„დავით ებრალიძე ფინანსთა მინისტრის მოადგილედ მუშაობდა. მას აქვს კონტროლის პალატაში მუშაობის მრავალწლიანი გამოცდილება, შესაბამისად, პროფესიული გამოცდილებიდან გამომდინარე, იგი ჩაიბარებს, ფინანსების, ლოჯისტიკის, შესყიდვების მიმართულებებს სამინისტროში" - აღნიშნა ხიდაშელმა მოადგილის წარდგენისას.

ასევე თავდაცვის მინისტრის მოადგილეები იქნებიან იურისტი ბესიკ ლოლაძე და საია-ს ყოფილი თავმჯდომარე ანა დოლიძე.

„ანას მთავარი დამსახურება არ არის ის, რომ ქალია. ის ძალიან მაღალი კვალიფიკაციის იურისტი და პრინციპული ადამიანია. ასეთად დაამახსოვრა მან თავი ყველას, როდესაც საია-ში მუშაობდა. ჩემი შერჩევის კრიტერიუმი მაღალი პროფესიონალიზმია. ანამ დაამთავრა კოლუმბიის უნივერსიტეტი. მისი ძირითადი მიმართულება იქნება უფლებები, ყველა ის თემა, რაც ქართველ ჯარისკაცებს, ჩვენს გმირებს, მათ ოჯახებს, დაჭრილ ჯარისკაცებს უკავშირდება" -აღნიშნა ხიდაშელმა.

ცნობილი გახდა, რომ ბესიკ ლოლაძე თავდაცვის სამინისტროს საპარლამენტო მდივანიც იქნება.

„იგი გახლდათ საკონსტიტუციო სასამართლოს წევრი, იუსტიციის მინისტრის მოადგილე და სახელმწიფო სამსახურში მუშაობის დიდი გამოცდილება აქვს" - განაცხადა თავდაცვის უწყების ხელმძღვანელმა.

განცხადება თავდაცვის სამინისტროში ცოტა ხნის წინ გაკეთდა.