საქართველო იმ ქვეყნებს შორისაა, სადაც ბიზნესის კეთება მაღალ დონეზეა- ჩაკრაბარტი

პოლიტიკა - 14:16, 15 May, 2015

1471

ევროპის რეკონსტრუქციისა და განვითარების ბანკის (EBRD) პრეზიდენტმა სერ სუმა ჩაკრაბარტიმ საქართველოში ბიზნესის კეთების შესაძლებლობებზე ისაუბრა და აღნიშნა, რომ საქართველო იმ ქვეყნებს შორისაა, სადაც ბიზნესის კეთება მაღალ დონეზეა აყვანილი.

„საქართველო არის იმ ქვეყნებს შორის, სადაც ბიზნესის კეთება ძალიან მაღალ დონეზეა აყვანილი და ის ერთ-ერთი ლიდერი ქვეყანაა, რომელსაც ძალიან კარგი შედეგები მოუტანა ქვეყანაში მიმდინარე რეფორმების განვითარებამ“, - განაცხადა სერ სუმა ჩაკრაბარტიმ. მისივე თქმით, ის ნაბიჯები, რომლებიც მთავრობამ უნდა გადადგას, ერთ-ერთი მთავარი ფაქტორია, რომელმაც საქართველოში ინვესტიციების ზრდა და ქვეყნის კლიმატის ფუნქციონირების გაუმჯობესება უნდა განაპირობოს.

„სწორედ ამიტომაც, ჩვენ მოვაწერეთ ხელი ურთიერთგაგების მემორანდუმს. პრემიერ-მინისტრმა პირდაპირ აღნიშნა, რომ კურსი არის აღებული კერძო სექტორის განვითარებასა და კლიმატის გაუმჯობესებაზე“, - განმარტა EBRD-ის პრეზიდენტმა.

საქართველოს მთავრობა და ევროპის რეკონსტრუქციისა და განვითარების ბანკი ინვესტიციების მოზიდვასა და ბიზნესგარემოს გაუმჯობესებაზე ერთობლივად იმუშავებენ, - ურთიერთგაგების მემორანდუმს, ინვესტორთა საბჭოს შექმნის შესახებ, საქართველოს პრემიერ-მინისტრმა ირაკლი ღარიბაშვილმა და ევრობანკის პრეზიდენტმა სერ სუმა ჩაკრაბარტიმ მოაწერეს ხელი.