პრემიერი-მინისტრის ირაკლი ღარიბაშვილის თქმით, საქართველოს მთავრობის ერთ-ერთი პრიორიტეტული სფერო განათლებაა.

ამის შესახებ ღარიბაშვილმა EBRD-ის ფორუმის ფარგლებში ქვეყნის საინვესტიციო პოტენციალის პრეზენტაციაზე განაცხადა.

„საქართველოს მიერ ადამიანური კაპიტალის განვითარებაზე კონცენტრირებამ შედეგად მოიტანა მთელი რიგი მნიშვნელოვანი ინიციატივა, რომელსაც მხარს უჭერს აშშ-ის ათასწლეულის გამოწვევის კორპორაცია. შედეგი სახეზეა. სან-დიეგოს უნივერსიტეტმა, საქართველოს სამ საჯარო უნივერსიტეტთან ერთად დაიწყო ამერიკული საბაკალავრო პროგრამების მიწოდება საბუნებისმეტყველო მეცნიერებათა, ტექნოლოგიების, ინჟინერიისა და მათემატიკის განხრით (STEM). საქართველოს მთავრობა აცნობიერებს მაღალკვალიფიციური STEM პროფესიონალებისა და სპეციალისტების მნიშვნელობას, რომლებიც პასუხობენ ბაზრის მოთხოვნებს და წვლილი შეაქვთ საქართველოს ეკონომიკის სხვადასხვა სფეროში მზარდი ინვესტიციების მოზიდვის საქმეში. ასევე საქართველოს მთავრობა აფინანსებს თითქმის 20000 სტუდენტის ტექნიკურ განათლებას და ამისთვის იყენებს ბაზარზე ორიენტირებულ მიდგომას", -განაცხადა ღარიბაშვილმა.